भांगरभूंय | प्रतिनिधी
भांगरभूंय । प्रतिनिधी
काणकोणः काणकोणा फाटल्या आयतारा जाल्ले 38वे धर्म प्रार्थना सभेंत सगल्या धर्माच्या प्रतिनिधींनी जातीय एकचार, संवसारीक शांतताय आनी मानवी एकचारा खातीर प्रार्थना केली. काणकोणच्या विविधा संस्थेन आयोजीत केल्ले हे सभेंत वेगवेगळ्या आठ धर्मांच्या प्रतिनिधीनी प्रवचनां सादर केली. प्रार्थना सभा आयोजीत करपाचें हें ताचें 34वें वर्स आशिल्लें.
हे प्रार्थना सभेंत कॅथोलीक धर्मगुरू, 7 बौद्ध भिक्षू (दलाई लामा पंथ), मौलाना, श्री श्री रवी शंकर गुरुजी, भट, ब्रम्हकुमारी, माद्री वांटेकार जाल्ल्यो. सभे खातीर महाराष्ट्र आनी कर्नाटक तशेंच दिवचल, पेडणे, म्हापशें, वास्को, मडगांव, सावड्डें आनी केपें तालुक्यांतले भावीक आयिल्ले. गोंयांतल्या आनी चड करून काणकोणातल्या सगल्या धर्मांच्या लोकां मदीं एकचार घडोवन हाडपा खातीर 1989 वर्सा सगल्या धर्माची प्रार्थना सभा आयोजीत केल्ली अशी म्हायती विविधा संस्थेचो प्राचार्या सुकूर फर्नांडीस हांणी दिली. वेगवेगळ्या धर्म गुरूंक हाडून आमी सुरवेच्या कांय वर्सांत दोन ते तीन प्रार्थना सभा घेताले. लोकां मदीं शांतताय आनी एकचाराचो संदेश पावोवपाचें काम प्रार्थना सभेवरवीं आमी करतात अशें तांणी सांगलें.
सभेंत रवी शंकर समूहाचे रवीशंकर, मुडगूड कर्नाटकांतले 10 बौद्ध भिक्षू, मांगोल हिल वास्कोच्या गुरुद्वाराचे गुरुशरण सिंग चावला, मौलाना महम्मद आलम, ब्रह्मकुमारी बी के शोभा बहनजी, पीबी केच्या काणकोण फाट्याचे वांगडी, कारवारचे रविशा कर गोपाळ, फादर फ्रेडी लोबो आनी हेर धर्माच्या प्रतिनिधींनी लोकांक एकचाराचो संदेश दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
