भांगरभूंय | प्रतिनिधी
भांगरभूंय । प्रतिनिधी
काणकोणः काणकोण तालुक्यांतल्या 7 पंचायतींतल्या गांवडोंगरी सोडून 6 पंचायतींत सरपंच आनी 7 उपसरपंचांची बिनविरोध निवड जाली. गांवडोंगरी पंचायतींत धिल्लन (यशवंत) देसाय हांका सरपंच जावपा खातीर वेंचणुकेक तोंड दिवचें पडलें. प्रभाकर गांवकार हांणी सरपंचपदा खातीर अर्ज सादर केल्ल्यान ही वेंचणूक जाली. मात देसाय हांणी 5 आड 3 मतांनी जैत मेळयलें. मात सलोनी गांवकार हिची उपसरपंच म्हणून बिनविरोध निवड जाली. पैंगीण पंचायतींचे सरपंचपद अपेक्षे प्रमाण सभापती रमेश तवडकार हांची घरकान्न सविता तवडकार हिका मेळ्ळां.
आगोंद पंचायतींत वेचून आयिल्ले सगले पयलेच फावट पंच जाल्यात. 71 वर्सां पिरायेची फातिमा रॉड्रिग्ज हिची सरपंच आनी 25 वर्सां पिरायेच्या प्रितल फर्नांडीस हिची उपसरपंच म्हणून बिनविरोध निवड जाली. ह्या पंचायत मंडळान भाजपा सरकाराचे मजतीत काम करपाचें थारायलां.
खोला पंचायतींत अजय पागी सरपंच आनी कृपेश वेळीप उपसरपंच जाला. सात वांगड्याचे हे पंचातींत दरेकलो आठ म्हयने सरपंच आनी उपसरपंच म्हणून काम करतलो. ही समजिकाय आदलो उपमुख्यमंत्री बाबू कवळेकार हांणी घडोवन हाडल्या अशें सांगतात.
हेर पंयातींतले सरपंच, उपसरपंच फुडले भशेन- श्रीस्थळ- सरपंच सेजल पुरुषोत्तम गांवकार, उपसरपंच- शिवराज व्ही नायक. पैंगीणः सरपंचः सविता तवडकार, उपसरपंच- सुनील श्रीधर पैंगीणकार. खोतीगांवः सरपंच- आनंदू गणबा देसाय. उपसरपंच- पुनम चंद्रकांत गांवकार. लोलयें-पोळेंः प्रतिक्षा सचीन बांदेकार, उपसरपंच- चंद्रकांत बाबय सुदीर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
