भांगरभूंय | प्रतिनिधी
भांगरभूंय । प्रतिनिधी
काणकोणः काणकोण मतदारसंघांतल्या सात पंचायतीच्या 56 वॉर्डांत वेंचणूक लडोवपी उमेदवारां मदीं वेंचून येवपाची सामकी चुरस आसा. पंचायत वेंचणूक पक्षीय पांवड्यार जरी जायना तरी सत्ताधारी भाजपान आपले समर्थक उमेदवार वेंचून येवचे म्हणून नेट लायला. काणकोणचो आमदार आनी सभापती रमेश तवडकरा हांची घरकान्न पैगीण पंचायतींतल्यान वेंचणूक लडयता. 59 वॉर्डांतल्या तीन वॉर्डांनी उमेदवार बिनविरोध वेंचून आयल्यात.
सात पंचायतींतल्या स पंचायतींनी आपले समर्थक उमेदवार वेंचून येवचे म्हणून रमेश तवडकारान प्रचाराचो नेट लायला आगोंद, श्रीस्थळ, पैंगीण आनी लोलयें- पोळें पंचायतींत तांणी चड लक्ष दिलां. गांवडोंगरी आनी खोतीगांव पंचायतींत ताचें समर्थक वेंचून येतले असो रंग आसा. तांची घरकान्न सविता तवडकार हिचे नदरेन पैंगीण पंचायतीच्या आमोणे वॉर्डाची वेंचणूक प्रतिश्ठेची आसा.
सविता तवडकार वेंचून येवची न्हय म्हणून काँग्रेस फुडारी जनार्दन भंडारी हांणी यत्न चलयल्यात. पैगीण पंचायतीते सरपंचपद बायलां खातीर राखीव आशिल्ल्यान सविता तवडकराक सरपंच करून काणकोणात घराणेशाय हाडपाचो रमेश तवडकार हांचो यत्न चल्ला असो आरोप काँग्रेस फुडाऱ्यांनी तांचेर केला.
आदलो आमदार आनी उपसभापती इजिदोर फर्नांडीस हांणी आपल्या समर्थक उमेदवारां खातीर नेट लायला. तांचो एक इश्ट धिल्लन देसाय गांवडोंगरी पंचायत वॉर्डांतल्या बिनविरोध वेंचून आयल्यात. पैगीणकार हांका पैंगीण मतदारसंघांतल्या बिनविरोध वेंचून हाडपा फाटल्यान तांचो हात आसा अशें सांगतात. इजिदोर हांचो लालयें- पोळे, पैंगीण, खोतीगांव, गांवडोंगरी आनी आंगोद पंचायतींत प्रभाव आसा. थंय तांच्या समर्थकांची पॅनलां आसात. कांय उमेदवारांनी भायल्या देशांनी आशिल्ल्या मतदारांक मतदान करपाक येवपा खातीर विमान, रेल्वे, बस तिकेटींची वेवस्था केल्या अशी खबर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
