भांगरभूंय | प्रतिनिधी
काणकोणः काणकोणां रेल्वेंत न्हिदेंत आसतना अज्ञात चोरांनी मूळ केरळच्या आनी सध्या पनवेल मुंबय रावपी अशोक आर हांची बॅग फारायली. ते बॅगेंत 4 कोटी 25 लाख रुपयांच्यो भांगराच्यो वस्ती आशिल्ल्यो.
काणकोणां क्रॉसिंगाचेर रेल्वे राविल्ली. त्या वेळार फांतोडेर 3 वरांच्या सुमाराक ही चोरी जाली. गुजरात सावन केरळ वचपी गांधीधान हमसफर एक्सप्रेसींतल्यान अशोक आर प्रवास करताले. भांगराच्यो वस्ती आशिल्ली बॅग सकयल कुलूप करून ते वयल्या बर्थाचेर न्हिदिल्ले. फांतोडेर रूळ बदलचे खातीर रेल्वे काणकोणां क्रॉसिंगाचेर राविल्ली. त्या वेळार बॅगेक लायिल्ली सांखळ कांपून बॅग फारायली. जे सुवातेचेर रेल्वे राविल्ली, थंयच्यान कांय अंतराचेर फोडिल्ले अवस्थेंत ती बॅग सांपडली. सकयल्या बर्थाचेर न्हिदील्ल्या एका प्रवाशाक कोणतरी बॅग घेवन वतना नदरेक पडलो. उपरांत तांणी अशोकाक उठयलो. तांणी बॅग सोदपाचो यत्न केलो, पूण ती तांकां मेळूंक ना. काणकोणां पावले उपरांत अशोक आर हांणी हे चोरी प्रकरणांत थंयच्या रेल्वे पुलिसां कडेन कागाळ केली. फुडलो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
