भांगरभूंय | प्रतिनिधी
काणकोण : घरांत आवय, मानसीक नदरेन सारकी नाशिल्ली तिचे परस ३ वर्सांनी व्हड भयण, जाल्यार एक भाव वेर्णा उद्देगीक वसणुकेंत कामाक वता. सगल्यांचे अपुरबायेचें, शिकपाक हुशार चली, विद्यार्थ्यांचे आवडीची सहाय्यक प्राध्यापिका सुचिता सुनिल बांदेकार हे २७ वर्सां पिरायेचे तरणाटे चली आयज माशें, काणकोणां गाडयेचो धपको लागून संवसाराक अंतरलें.
अपघाताची म्हायती मेळटांच, गांवचे लोक तशेंच लागींचे लोक घडणुके सुवातेर पावले. सुचिताचे दुचाकीक गाडयेन धपको दिल्ल्यान तिचो चुरो जाला. अपघात जाल्ले गाडयेचो धनी आपल्या कुटुंबाक गोंयच्या विमानतळावेल्यान घेवन कारवारा वतालो. माशें पावतकच तांकां हो अपघात जालो. गाडयेंत आशिल्ल्यांक दुखापत जाली. काणकोण पुलिसांनी अपघाताचो पंचनामो केलो. उपरांत मरण आयिल्ले तरणाटेची कूड पोस्टमार्टमा खातीर धाडली.
सुचिता गांवांत सगल्यांचे आवडीचें. कॉलेजींत शिकोवपाक वतना बस वेळार मेळनाशिल्ल्यान ताणें हालींच दुचाकी घेतिल्ली. गांवांतल्या सगल्या कार्यावळींनीं तें वाटेकार जातालें, अशें लोलयां, पोळेंचे पंच वांगडी सचिन नायक हांणी सांगलें.
श्री मल्लिकार्जुन महाविद्यालयाची विद्यार्थीनी आनी उपरांत महाविद्यालयाची सहाय्यक प्राध्यापक (लेक्चर बेजीस) म्हणून कोंकणी विशय शिकोवपी सुचिता विद्यार्थ्यांचे आवडीचें. महाविद्यालयांतलें पयलें वर्स आनी दुसर्या वर्साच्या विद्यार्थ्यांच्यो परिक्षा सुरू आसात. मात, तिका आयज सुपरव्हिजन नाशिल्लें. तरी ती कॉलेजींतल्या विद्यार्थ्यांक परिक्षेच्या दिसांनीय नोट्स दिवपाक येतालें.
कॉलेजींत जावपी विवीध सांस्कृतीक कार्यावळींचें सुत्रसंचालन ती करतालें. उत्कृश्ट नाट्य कलाकार आशिल्ल्या सुचिता हांणी फाटल्या सप्तकांतूच देळ्यां जाल्ल्या नाटकांत वांटो घेतिल्लो. आपल्या अभिनयान प्रेक्षकांचीं मनां जिखिल्लीं. तोच तिचो नाटकांतलो निमाणो अभिनय थारलो.
नीट परिक्षा पास जावन तें ह्या महाविद्यालयांत शिकयतालें कश्टी, जिद्धी आनी सुस्वभावी सुचिताक आयज अशें अकस्मात मरण आयिल्ल्यान, तिच्या गांवांत, तशेंच महाविद्यालयांत शिक्षक, विद्यार्थ्यां मदीं दुख्ख पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
