भांगरभूंय | प्रतिनिधी
काणकोणः पुलीस यंत्रणा पंचायत वेंचणुकेच्या कामाक लागिल्ल्याची संद सादून चोरांनी काणकोणां बाजारांत तशेंच रस्त्याचे कुशीक आशिल्लें संजय वेर्णेंकार हांचें भांगराच्या वस्तींचे दुकान मंगळारा राती फोडलें. मुख्य शटर बागोवन सुमार 1 लाख रुपया मोलाच्यो भांगराच्यो वस्ती चोरल्यो. हे संबंदांत काणकोण पुलिसांनी गुन्यांव नोंद केला.
ह्या दुकानाचे धनी संजय वेर्णेंकार हांकां हे विशीं विचारलें तेन्ना तांणी सांगलें, आपल्या दुकानांतल्यान रुपें आनी1 ग्राम भांगर चोरांनी फारायलें. ताचें मोल सुमार 1 लाख आसा. आपूण भांगराच्या वस्तींची ऑर्डर घेवन हेरां कडेन ते तयार करून गिरायकांक दितात. ताका लागून दुकानांत भांगराच्यो वस्ती दवरिनात, अशें वेर्णेंकार हांणी सांगलें.
भर बजारांत चोरी जाल्ल्यान काणकोणच्या सराफी दुकानकार आनी हेर वेपाऱ्यांनी पुलीस यंत्रणा कार्यरत नाशिल्ल्यान ही चोरी जाल्ल्याची खंत उक्तायली. हे संबंदांत काणकोणचे पुलीस निरिक्षक चंद्रकांत गांवस हांकां विचारलें तेन्ना तांणी सांगलें, दिसपट्टी पुलीस गस्त सुरू आसता, मात पंचायत वेंचणुके निमतान सगळे पुलीस पंचायत वेंचणुकेक तैनात आसात. तरी लेगीत हे संबंदांत खोलायेन तपास सुरू केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
