भांगरभूंय | प्रतिनिधी
गस्तीक आशिल्ल्या पुलिसांक लागून चोरयेचो कट अपेसी
काणकोण: चावडी- काणकोणचे प्रविण मोहन वेर्णेंकार हांच्या घराच्या दुरगा भितर आशिल्लेंं भांगराच्या वस्ती विकपी दुकानांत मंगळारा मध्यान रातीं चोरयेचो यत्न जालो. पुलिसांक लागून तो अपेशी थारलो. हे चोर पिकास आनी पारय घेवन आयिल्ले. तांणी सीसीटिव्ही केमेर्यांक काळो स्प्रे मारलो. प्रविण वेर्णेंकार हांच्या दुकानाच्या शर्ट्सची कुलुपां मडलीं तशेंच दुकानांच्या शेजराकूच भांगराच्या दुकानाचें धनी प्रविण वेर्णेंकार हांचे घर आशिल्ल्यान आनी घरांतीं मनशां भायर येवचीं न्हय म्हूण घराचें मुखेल दार राजवान बांदलें.
तेन्ना चावडी हांगा रातचे गस्तीर आशिल्ल्या पुलिसांक आवाज आयिल्ल्यान ते आवाजाचे वटेन दोन फावटीं गेले. मात तांकां कोणूच दिसूंक ना. परत तिसरे फावट तांकां लोखणाच्या पत्र्या सारकलो आयले उपरांत ते परत ते वटेन गेले तेन्ना तांकां ७ ते ८ जाणांची टोळी नदरेक पडली. पुलीस तांकां धरपा खातीर तांचे दिकेन धांवपाक लागले तेन्ना ह्या चोरांनी पुलिसांचेर फांतर शेवटून मारले आनी थंयच्यान पळ काडलो. पुलीस तांच्या फाटल्यान धांवले मात ते तांकां मेळूंक ना. चोरांनी मुखेल दारांक बांदिल्लो राजू सोडून प्रविण आनी हेरांक घरांतल्यान भायर सरपाक मार्ग मेकळो केलो.
हे चोर चोरी करपाक आयिल्ले तेन्ना आपलें जेवणूय वांगडा घेवन आयिल्ले. तशेंच पिकासूय तांणी हाडिल्लो.
चोरांनी सगल्यांत पयलीं सी.सी.टी.व्ही. केमराक पेंट मारून बंद केल्ल्यान ते तातूंत दिसले नात. गस्तीवेल्या पुलिसांनी आपल्या वरिश्टांक घडणुकेची म्हायती दिले उपरांत बसस्टॅण्डाचेर, रेल्वे स्टेशनार आनी हेर सुवातांचेर तपासकार्यास सुरुवात केली. मात चोर सापडूंक नात. उपरांत सकाळीं पुलिसांनी ठसे तज्ञ आनी सुण्या पंगडा वरवीं चोरांचो सोद घेवपाचो यत्न केलो.
गोंयच्या विंगड विंगड वाठारांनी सद्या चोरयेच्यो, दरोड्याच्यो घडणुको घडिल्ल्यान पुलिसांनी गस्त वाडोवची अशी मागणी प्रविण वेर्णेकार हांणी केली.
जंय जंय बिगर गोंयकार बिराडाक रावतात तांची खोलायेन तपासणी केल्यार चोरयेच्या घडणुको ×उण्यो जातल्यो अशें कांय वेपार्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
