भांगरभूंय | प्रतिनिधी
काणकोण: महात्मा गांधी आनी लालबहादूर शास्त्री हांची जयंती काल काणकोणां व्हड दबाज्यान मनयली. भारतीय जनता पक्षाच्या काणकोण मंडळान भाजपा कचेरेंत ह्या व्हड फुडाऱ्यांची जयंती मनयली. हे कार्यावळीक काणकोणचे आमदार तशेंच सभापती रमेश तवडकार, मंडळ अध्यक्ष विशाल देसाय आनी हेर पदाधिकारी, कार्यकर्ते हाजीर आशिल्ले. सभापती तवडकार हांणी दोनूय फुडाऱ्यांच्या फोट्याक फुलांहार घालून तांकां आर्गां ओंपलीं.
काणकोण पालिकेचे आदले नगराध्यक्ष तशेंच नगरसेवक रमाकांत नायक गांवकार हांणी किंदळे, मणगण, पणसुलें तशेंच चावडेर नितळसाण अभियान घडोवन हाडिल्लें. हे नितळसाण मोहिमेंत कात्यायणी बाणेश्वर विद्यालयाचे विद्यार्थी, जिजाऊ महिला मंडळाच्यो पदाधिकारी तशेंच आदल्यो नगराध्यक्षा प्रार्थना नायक गांवकार, कात्यायणी बाणेश्वर विद्यालयाच्या कार्यकारिणीचे अध्यक्ष दर्शन नायक गांवकार, विद्यालयाचे शिक्षक, नगरसेविका अमिता पागी, नार्सिस्को फर्नांडीस आनी गांवचे नागरीक वांटेकार जाल्ले.
काणकोण मामलेदार कचेरे वतीन कचेरी तशेंच कचेरे भोंवतणच्या वाठारांत नितळसाण अभियान राबयलें. ह्या वेळार मामलेदार मनोज कोरगांवकार, रोहिदास गांवकार, मामलेदार कचेरेचे आनी उपजिल्होधिकारी कचेरेचे अधिकारी आनी कर्मचारी वांटेकार जाल्ले.
चावडी प्रभागाचे नगरसेवक रमाकांत नायक गांवकार हांच्या मार्गदर्शना खाला चावडेर राबयिल्ल्या नितळसाण अभियानांत चावडी प्रभागांतलीं बायलां आनी दादले व्हड संख्येन वांटेकार जाल्ले. शेळेर ते रवींद्र भवना मेरेन ही नितळसाण मोहीम राबयली. ह्या वेळार नगरसेवक रमाकांत नायक गांवकार हांचे सयत आदले उपनगराध्यक्ष दिलीप केंकरे, आदल्यो नगराध्यक्षा प्रार्थना नायक गांवकार, बबेश बोरकार, शंकर नायक, पूर्णाकांत तेलेकार, आनंद कोठारकार, अमर शिरोडकार, रोहिदास रायकार, सुदेश महाले, गौरव रायकार, प्रशीत देसाय, पूर्णानंद केंकरे. शिवराम बाळे, संदीप देसाय, शुभांगी बोरकार, शिवशंकर केंकरे, कृष्णा कोमरपंत आनी हेरांचो आस्पाव आशिल्लो.
ह्या वेळार रमाकांत नायक गांवकार, दिलीप केंकरे, पूर्णानंद केंकरे, शुभांगी बोरकार आनी नितळसाण अभियानाचो संदेश दिवपी म्हायती दिली आनी आपल्या घरा बरोबरच आपलो सरभोंवतणचो वाठार नितळ दवरपाची विनंती केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
