भांगरभूंय | प्रतिनिधी
काणकोणः काणकोणां तीन आपत्काली आसरो घरांचें, शिंपणावळ मंत्री सुभाष शिरोडकार हांचे हस्तुकीं 30 नोव्हेंबराक उक्तावण जालें. केंद्र सरकारान संवसारीक बँकेच्या आदारान हीं घरां बांदल्यांत.
पैंगीण आनी नगर्श्यां बांदिल्ल्या आसरो घरांक दरेकी 3 कोटी जाल्यार चापोली वाठरांत बांदिल्ल्या आसरो घराक 3.50 लाख रुपया खर्च आयला.
पेंगीणच्या आसरो घरांच्या उक्तावण सुवाळ्याक सरपंच सविता तवडकार, उपसरपंच सुनील पैंगीणकार आनी हेर पंच हाजीर आशिल्ले.
पत्रकारां कडेन उलयतना मंत्री शिरोडकार हांणी सांगलें, ह्या आसरो घरांची देखभाल थळाव्या लोकांनी करची. हीं आसरो घरां थळावे पंचायती कडेन देखरेखी खातीर दितले. तशेंच ह्या वाठारांत आशिल्ली शाळा, बालवाडी लेगीत हेच वास्तूंत स्थलांतरीत करतले.
सोबीत वास्तू उबारिल्ले खातीर मंत्री शिरोडकार हांणी कंत्राटकार तशेंच शिंपणावळ खात्याच्या अधिकाऱ्यांक परबीं दिली. तशेंच हे वास्तू खातीर ज्या ज्या लोकांनी जमनी दान दिल्यात, तांचेय उपकार मानले.
2009 त काणकोणा आयिल्ल्या हुवाराक लागून आसरो घरा बांदपाची संकल्पना सुचली आनी आयज आसरो घरां उबीं जाल्यांत. काणकोणां आसरो घरां उबीं जावप ही खोशयेची गजाल, अशें सभापती रमेश तवडकार हांणी सांगलें.
2009 त घडिल्ली घडणूक परतून घडची न्हय, अशें सविता तवडकार हांणी मागलें. तशेंच हे वास्तूची पुराय जतनाय घेतले, अशें उतर दिलें.
थळावीं भुरगीं ल्हान सुवातेंत शिकतालीं. आतां तांकां व्हड सुवात मेळिल्ल्यान खोशी जाता, अशें सरपंच सुनील पैंगीणकार हांणी सांगलें. ह्या वेळार शिंपणावळ खात्याचे वरिश्ठ अधिकारी अंकुश गांवकार, पाटील, करमरकार, विशाल देसाय, महेश नायक, सतीश पैंगीणकार, विकास प्रभू, दामोदर शेणवी, पंच आनी हेर नागरीक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
