भांगरभूंय | प्रतिनिधी
भांगरभूंय । प्रतिनिधी
काणकोणः श्रीस्थळ हांगच्या श्री मल्लिकार्जुन देवाचो वर्सुकी शिगमोत्सव पारंपरीक रुढी आन रिवाजां प्रमाण आनी धर्मीक विधींनी 29 तें 31 मार्च मजगतीं जातलो. आयज (शुक्रार) 29 मार्चाक सुवासिनींचो दिंवजांचो उपास आसतोलो. ह्या दिसा मल्लिकार्जुन देवाची सकाळीं विधीवत पूजा अभिशेक जातलो. रातंयां 10 वरांचेर देवाची पालखेंतल्यान मिरवणूक काडटले.
शेनवार 30 मार्चाक सकाळीं दिवजां मिरवणूक आनी भोवरी जातली. फांतोडेर सुवासिनी मातयेचें पारंपरीक दिवज आपल्या घरवय- मठा कडेन पेटयतलीं आनी देवळाच्या प्राकारांत दिवजाचे भोवरींत वांटेकार जातल्यो. दिवप पालोवपाचो “ओपले” विधी जातलो. म्हाजनाचे ल्हान भुरगे आपली गुडी सेवा देवाक ओपतले. सांजे गुलालोत्सव जातलो. रातया खोलकार भावां वतीन सुवारी वादन आनी पालखी जातली.
आयतार 31 मार्चाक सकाळीं शेलचे भोवरीची कार्यावळ जातली. लग्न जाल्ल्या नव्या दादल्यांनी आपले फाटीर सुई आनी दोर तोपून घेवपाची ही शेली नांवाची प्रथा हांगा पाळटात. अवतार पुरुसाची तरंगा देवळा सरभोंवतणी धोल- ताश्यांच्या तालार नाचयतले. तलवार, दांडपट्टो फिरयतले. ही कार्यावळ पळोवपाक हजारांनी भावीक येतात. उपरांत तुलाभार सेवा जातली. दनपारां 2 वरांचेर राजांगणात अवतार पुरुसाचो अवसर आनी भाविकांक कौल प्रसाद दिल्या उपरांत रातयां तरंगाचे विसर्जन आनी शश्ठीचे जात्रेतो समारोप जालो.
शिगमोत्सवाच्या दिसांनी भाविकांनी देवळाच्या प्राकारांत जोटी, बेल्ट वा तश्यो वस्तू घालून येवपाक बंदी आतना. भाविकांनी सहकार्य करचें असें आवाहन देवस्थानाच्या कार्यकारी समितीचो अध्यक्ष विठोबा देसाय हाणे केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
