भांगरभूंय | प्रतिनिधी
सभापती रमेश तवडकारः काणकोणकारांक गांवघरा हाडपाचो उद्देश
भांगरभूंय । प्रतिनिधी
मडगांवः लोकोत्सव हो काणकोणच्या फुडारा खातीर पर्यायी विचार. काणकोणचे लोक जे काणकोण सोडून मडगांव आनी हेर शारांनी रावतात, तांकां परतून काणकोणां येवचे खातीर काणकोणां रोजगाराच्यो संदी उपलब्ध करून काणकोणची उदरगत करची, हो उद्देश लोकोत्सवा फाटल्यान आसा, अशें सभापती रमेश तवडकार हांणी सांगलें. मडगांवच्या रवींद्र भवनांत आयोजीत केल्ले पत्रकार परिशदेंत ते उलयताले.
ह्या वेळार फातोड्डेंचे आदले आमदार दामोदर नायक, दक्षीँ गोंय भाजपा मंडळाचे अध्यक्ष तुळशीदास नायक, मडगांवचे नगराध्यक्ष दामोदर शिरोडकार, उपनगराध्यक्ष दीपाली सावळ, मडगांव भाजपा मंडळाचे अध्यक्ष रुपेश महात्मे, फातोड्डें भाजपा मंडळाचे अध्यक्ष मनोहर बोरकार, कुडटरीचे भाजपा फुडारी अँथोनी बार्बोजा हाजीर आशिल्ले.
काणकोणा एज्युकेशन हब, एग्रोबेस इंडस्ट्रीज सेंटर, गोंयचे संस्कृतीचें संवर्धन, गोंयचे मनीसपण सांबाळप अशा सगळ्या मळांचेर काणकोण मुखार व्हरतले. रोजगार उपलब्ध करून दिवप आनी काणकोणची उदरगत करप हो आपलो विचार आसा, अशें सभापती तवडकार हांणी सांगलें. ह्या वेळार दामोदर नायक आनी नगराध्यक्ष शिरोडकार हांणी आपले विचार उक्तायले आनी लोकोत्सव पळोवपाक सगळ्यांनी काणकोणां वच्चें, असो उलो मारलो.
लोकोत्सवाक राष्ट्रपतींक आमंत्रण
7 ते 11 डिसेंबर ह्या काळांत आदर्श युवा संघा वतीन आदर्श ग्राम पैंगीणी लोकोत्सव आयोजीत केला. ह्या सुवाळ्याक राष्ट्रपती द्रौपदी मुर्मू हांकां आमंत्रीत केल्या. तशेंच पांच ते स केंद्रीय मंत्री, हेर राज्यांचे मंत्री हांकांय आमंत्रीत केल्यात, अशी म्हायती सभापती रमेश तवडकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
