भांगरभूंय | प्रतिनिधी
काणकोण, संजय कोमरपंत : काणकोणाच्या पुलीस स्टेशना लागसारा आशिल्ल्या नागरी पुरवण विभागाच्या मालकेच्या दोन गुदांवां मदल्या एका गुदावांत उजो पालोवपी दळाचें कार्यालय आसा. ताका लागून राष्ट्रीय म्हामार्गाक तेंकून आशिल्ल्या ह्या उजो पालोवपी दळाच्या विभागाक लागून काणकोणचे जनतेक आपत्ती कालीन वेळार उजो पालोवपी दळाक संपर्क करप सोपें जातालें. आतां हें उजो पालोवपी दळ विभाग शेळेर पुलीस स्थानका लागसारच्यान सुमार ५ किलोमीटर पयस चापोली धरणा लागसारा बांदिल्ल्या आपतकालीन आसरो घरांत हालोवपाच्यो हालचाली सुरू जाल्यात. मेळिल्ले म्हायती प्रमाण सध्या नागरी पुरवण खात्याचें एक कार्यालय काणकोण मामलेदार कार्यालयांत एके आडखळीचे सुवातेर आसा. ह्या कार्यालयांतल्या कर्मचार्यांक कार्यालयांत बसपाक लेगीत सारकी सुवात ना.तातूंत रेशन कार्डा विशीं चवकशी आनी हेर कामां निमतान ह्या कार्यालयांत वचपी नागरिकांकूय थंय सारकें उबें रावूंक लेगीत मेळना. हे फटभूंयेर नागरी पुरवण विभागान आपल्या मालकेच्या आनी सध्या उजो पालोवपी दळ वापरपी गुदांव आपल्याक दिवपा खातीर वरिश्ठां कडेन आनी संबंदीत खात्यांक पत्र बरयिल्लें. मदेंच मोखर्ड हांगच्या हावसींग बोर्डाच्या जाग्यारूच उजो पालोवपी दळाचें केंद्र हालोवपाचे नदरेन विचार आशिल्लो. मात थंयची जमीन संपादीत करपाचे नदरेन गृहखात्यान पयशे भरूंक नाशिल्ल्यान ती सुवात आजूनय उजो पालोवपी दळाक मेळूंक ना.
आतां काणकोणच्या उजो पालोवपी दळाक चापोली हांगच्या आसरो घरांत आपलो विभाग हालोवपाच्यो सुचवण्यो आयिल्ल्यान हें दळ कांय दिसांनी हांगा हालयतले. मात उजो पालोवपी दळाचो बंब थंय व्हरप आनी थंयच्यान काणकोणच्या विवीध भागांत घेवन वचप सामकें कठीण आसा. तशेंच नगर्से हांगच्या चापोली वचपाक रस्तो सामको अशीर आसा. तशेंच हांगा रस्त्याचे दोनूय वटेन घरां आशिल्ल्यान जायते फावट हांगचे लोक रस्त्यार आपल्यो दुचार, चारचाकी पार्क करतात. तेन्ना आपत्ती कालीन वेळार ह्या सगळ्याक तोंड दिवन उजो पालोवपी दळाक कठीण जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
