भांगरभूंय | प्रतिनिधी
म्हापशें: काणका साई देवळा कुशीक मोडिल्लो लायटीचो खांबो बदलपाच्या कामा वेळार ह्या खांब्या सयत सकयल पडून भालेश्वर कुमार राठोड (32, मूळ झारखंड) ह्या कामगाराक मरण आयलें.
ही घडणूक काल (बिरेस्तारा) सकाळीं 10.30 वरांच्या सुमाराक घडली. घडणूक थळार दुर्घटनाग्रस्त लायटीचो खांबो जीर्ण जावन मोडूंक पाविल्लो. हो खांबो बदलून ते सुवातेर नवो खांबो घालपा खातीर वीज खात्यान एकल्याक कंत्राट दिल्लें.
सकाळीं कंत्राटदारान कामगारा वरवीं लायटीचो खांबो बदलपाचें काम हातांत घेतलें. मयत भालेश्वर कुमार हो त्या मोडूंक पाविल्ल्या खांब्यार चडून लायटीच्यो सरयो काडटालो. ह्याच वेळार तो खांब मुळा सयत मोडलो आनी पडलो.
ताचे बरोबर मयतूय पडलो आनी रस्त्या कुशीच्या गटारांत आडकलो. हेर कामगारांनी ताका गटारांतल्यान भायर काडलो आनी जखमी अवस्थेंत म्हापशेंच्या जिल्हो हॉस्पिटलांत दाखल केलो. थंयच्यान ताका रोखडोच गोमॅकाँत हालयलो. पूण वाटेरूच ताका मरण आयलें.
घडणुकेची म्हायती मेळटकच म्हापशेंचे पुलीस उपनिरिक्षक बाबलो परब आनी हवालदार शिवाजी शेटकार हांणी पंचनामो केलो.
मजगतीं, घडणुकेची म्हायती मेळ्ळे उपरांत वीज खात्याचे कार्यकारी अभियंते सुभाष पार्सेकार हांणी कनिश्ठ अधिकाऱ्यां सयत घडणूक थळार भेट दिवन पळोवणी केली. घडणुके उपरांत हेर कामगारांनी हो लायटीचो खांबो बदलून ते सुवातेर नवो खांबो उबारलो आनी वीज पुरवण सुरळीत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
