काजू मार्केटींग आनी पदार्थांचो पर्यटनाक लाव करपाचे यत्न : विश्वजीत राणे

भांगरभूंय | प्रतिनिधी

पणजी : काजू फेणी तशेंच काजूचे हेर पदार्थ हें गोंयचें खाशेलेपण आसा. काजीचें मार्केटींग आनी पदार्थांचो प्रसार करीत पर्यटनाक लाव करपाचे यत्न आसात अशें रानां खात्याचे मंत्री विश्वजीत राणे हांणी म्हणलां. पणजेंत 15 आनी 16 एप्रीलाक बांदोडकार मैदानाचेर काजू महोत्सव जातलो. काजू महोत्सवाच्या लोगोचें उक्तावण जालें.

लोगो उक्तावणाचे कार्यावळीक राना खात्याचे मंत्री विश्वजीत राणे हे मुखेल सोयरे आशिल्ले. तशेंच रानां उदरगत म्हामंडळाच्यो अध्यक्ष देविया राणे, मुखेर रानां संरक्षक राजीव गुप्ता तशेंच हेर अधिकारी हाजीर आशिल्ले.

काजीच्या लागवडीचेर खूबशा लोकांचो उदरनिर्वाह निंबून आसा. काजीची लागवड वाडची, उत्पादन वाडचें म्हूण यत्न जावपाक जाय. रानां म्हामंडळाची जापसालदारकी मोटी आसा. काजीची लागवड, काजीचे मार्केटींग आनी हेर पदार्थ हांचो पर्यटनाक लाव जावप शक्य आसा. रानां उदरगत म्हामंडळाक हातूंत मोटे योगदान दिवचें पडटलें, अशें रानां खात्याचे मंत्री विश्वजीत राणे हांणी सांगलें.

काजीचें उत्पादन वाडचें, ताचो प्रसार जावचो म्हूण राज्यांत काजू महोत्सव जाता. पयलेच खेपे हो महोत्सव जाता. गोंयांत वर्साक 24 हजार टन काजीचें उत्पादन जाता. हें उत्पादन 37 हजार टना मेरेन वाडप शक्य आसा. हाचे खातीर काजींची नवी लागवड करची पडटली. दर हॅक्टरी काजीचें उत्पादन वाडोवचें पडटलें. रानां म्हामंडळ काजीची लागवड करता. हातूंत 60 हजार बायलां वावर करतात. काजू उद्देगांत रोजगार दिवपाची तांक आसा, अशें देविया राणे हांणी सांगलें.

काजू फेणी तशेंच काजू गर हो गोंयचो ब्रँड आसलो तरी देशांत काजू उत्पादनांत गोंयचो नंबर सातवो आसा. काजू उत्पादनांत गोंय स्वयंपूर्ण जावपाची गरज आसा अशें तांणी म्हणलें.

आधारभूत रक्कम वाडोपाचे यत्न

काजीक किलाक 150 रुपया दर मेळपाक जाय. काजीच्या आधारभूत रकमेक वाड करची, असो प्रस्ताव हांव कृशी मंत्री रवी नायक हांचे कडेन मांडटलों. वाळपय मतदारसंघात काजीचेर बऱ्याच जाणांचो उदरनिर्वाह निंबून आसा अशें मंत्री विश्वजीत राणे हांणी सांगलें.

वॅबसायटीचें उक्तावण

रानां उदरगत म्हामंडळान आपली वॅबसायट सुरू केल्या. लोगोच्या उक्तावणा वेळार वॅबसायटीचे उक्तावण जालें. वॅबसायटीचेर म्हामंडळाचे उपक्रम आनी सगल्या कार्यावळींची म्हायती आसतली.