भांगरभूंय | प्रतिनिधी
आमदार डॉ. देविया राणे: सत्तरी म्हाल शेतकरी संस्थे वतीन काजू वेवस्थापनाचेर शिबीर
वाळपय: सत्तरी म्हालांतले सत्तरी, पेडणें, केपें, काणकोण, धारबांदोडें अश्या जायत्या भागांतल्या नागरिकांचें पोट काजू उत्पादनाचेर चलता. नवे तरेन काजू बागायतीची लागवड जाल्यार तांतल्यान बरे तरेन उत्पादन येवपाक शकता. आदलो आनी आतांच्या काळांत बरोच बदल घडून आयला. आतां नवें तंत्रज्ञान आयलां. नवी शास्त्रोक्त पद्धतूय वापरप शेतकारांक फायद्याचें थारूं येता. हांतल्यान बरे तरेन काजुचें उत्पादन जावपाक शकता. सध्या बाजारांत काजवाच्या बियांक बरी मागणी आसा. पूण ते तरेन काजू उत्पादकांक दर मेळना. अशी सध्याची परिस्थिती आसा. हे विशीं आपणें शेतकी खात्याच्या संचालका कडेन चर्चा केल्या. काजू उत्पादकांक प्रती किलो 180 दर मेळप सामकें गरजेचें. हे विशीं मुळाव्या पांवड्यार चर्चा जाल्या. शेतकी खात्याच्या संचालकांनी प्रती किलोक 150 रुपया दिवपा विशीं मान्य केलां. हे विशीं आपूण सतत फाटपुरवण करतां. काजू उत्पादकांक प्रती किलो 150 रुपया मेळप गरजेचें, अशें गोंय वन विकास महामंडळाची चेअरमन तशेंच वाळपय मतदार संघाची आमदार डॉ. देविया राणे हांणी सांगलें.
गोंय शेतकी खातें, काजू मंडळ केरळ, सत्तरी म्हाल शेतकार संस्थे वतीन आयोजीत काजू वेवस्थापनाचेर एका दिसाच्या शिबिराचे उक्तावण कार्यावळीक आमदार डॉ. राणे मुखेल सोयरी ह्या नात्यान उलयताली.
ह्या वेळार माचयेर काजू मंडळाचे केरळचे वेंकटेश हुब्बळी, वाळपय नगराध्यक्ष सेहझीन शेख, चेअरमन पांडुरंग गांवस, काजू लागवड तज्ञ विश्राम गांवकार, वाळपय विभागीय कृषी अधिकारी विश्वनाथ गांवस, व्हायस चेअरमन सगूण वाडकार, जिल्हो पंचायत वांगडी देवयानी गांवस, अनिल काटकार हे हाजीर आशिल्ले. ह्या वेळार जायत्या शेतकारांनी परदेशांतल्यान येवपी काजू संबंदी प्रस्न मांडले.
सत्तरी म्हालांत काजू उत्पादन वाडोवपाचे नदरेन यत्न
गोंय वन विकास महामंडळाच्यो खुबश्या म्हालांनी लागवडी आसात. सध्या केले, काणकोण आनी पेडणें ह्या वाठारांत आशिल्ल्यो ह्यो वन खात्याच्यो लागवडी बरे तरेन उत्पादन दिता. पूण हातूंत सत्तरी म्हाल पुरायेन फाटीं आसा, हे विशीं आमदारान हुस्को उक्तायलो. येवपी काळांत सत्तरी म्हालांत वन महामंडळा वरवीं नवी लागवड करून उत्पादन वाडोवपाचे नदरेन यत्न करतली. नवे तरेची लागवड करपाचेर भर दितले. ताका लागून सगळ्या नागरिकांनी आनी शेतकारांनी, काजू उत्पादकांनी सहकार्य करचें अशी मागणी आमदार डॉ. देविया राणे हिणें केली.
परदेसांतल्यान येवपी काजुचेर गोंयचो ब्रँड घालप चुकीचें: डॉ. देविया राणे
व्हिएतनाम, श्रीलंका, दक्षीण आफ्रिकेंतल्यान काजू व्हड प्रमाणांत आयात जातात. ताका लागून गोंयच्या काजुची प्रतिमा इबाडटा. पर्यटक गोंयच्या काजुचेर आकर्शीत जातात. पूण भायल्या देशांतले काजू गोंयांत उपलब्ध जाल्ल्यान गोंयच्या काजूचें नांव इबाडलां. देखून अशे तरेचे काजू गोंयांत आयात जावचे न्हय अशी मागणी पयलीं केल्या. हे मागणेची फाटपुरवण करतले. परदेसांतल्यान येवपी काजुचेर गोंयचो ब्रँड घालप चुकीचें.
व्यंकटेश उबळी हांणी, काजू उत्पादना वरवीं बरे तरेची अर्थीक उलाढाल शक्य आसा. पूण वेवस्थीत नियोजन करपाची गरज आसा. गोंय आनी सिंधुदुर्ग ह्या वाठारांनी जावपी काजूंक बरी रूच आसा. ताका लागून हांगच्या काजवांक बरी मागणी आसा. ह्या दोनूय वाठारांतल्या काजूंक जपानांत व्हडा प्रमाणांत मागणी आसा. ताका लागून काजूची लागवड करून अर्थीक नदरेन घटमूट जावपाचे नदरेन फुडें सरपाची मागणी कोची बोर्डाचे व्यंकटेश उबळी हांणी केली.
वाळपय विभागीय कृषी अधिकारी विश्वनाथ गांवस हांणी कृषी खात्या वरवीं उपलब्ध आशिल्ल्या खुबश्या येवजण्यांचो फायदो घेवचो. अनुदानाच्या स्वरूपांत काजू लागवड, आंबो लागवड, नाल्ल लागवडी खातीर शेती खात्याच्यो जायत्यो सवलतीच्यो येवजण्यो आसात. तांचो फायदो घेवचो अशें तांणी सांगलें.
सुरवातेक परंपरीक दिवली पेटोवन कार्यावळ सुरू जाली. माचयेर हाजीर आशिल्ल्या मानेस्तांक संचालक सिताराम देसाय, संचालक सह्याजी देसाय, संचालक सुरंगा नायक, संचालक प्रदीप गवंडळकार, कार्यकारी संचालक सुरेश गांवकार, संचालक नारायण गांवकार, कर्मचारी कृष्णा जाधव, टी. आर. सावंत हांणी फुलांचे तुरे भेटोवन येवकार दिलो.
ह्या वेळार संस्थेच संचालक अनिल काटकार, नगराध्यक्ष सेहझीन शेख हांणी आपले विचार मांडले. पुराय कार्यावळीचें सुत्रसंचालन राघोबा परब आनी निमाणें संस्थेचे व्हायस चेअरमन सगूण वाडकार हांणी उपकार मानले.
उपरांत डॉ. विश्राम गांवकार हांणी काजू झाडांची लागवड, वेवस्थापन, तांची जतनाय कशी घेवप ह्या विशयांचेर मार्गदर्शन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
