भांगरभूंय | प्रतिनिधी
काजूर – केप्यां इश्टाच्या घरा स्नेहमेळाव्याक गेल्ली, फारपेट करपी तरणाटोय सांखळेचोच
केपें : काजूर – केप्यां एका इश्टागेर आपल्या हेर इश्टां वांगडा स्नेहमेळावो करपाक गेल्ल्या सांखळेच्या तरणाटेक आर्माची गुळी लागून मरण आयलें. तन्वी घाडी (22 वर्सां) अशें ह्या तरणाटेचें नांव आसा. ताच्या मानेक गुळी लागल्या. वांगडचो श्वेत गावडे (22 वर्सां, सांखळी) हाका पुलिसांनी धरला. सुत्रां सांगता ते प्रमाण आर्म घेवन तो फकाणां करतालो, चुकून ट्रिगर दाबलो आनी गुळी सुटून तन्वीक लागली, अशें ताणें पुलिसांक सांगलां. तांच्या वांगडा आनीकूय कांय तरणाटे – तरणाटी आसात. सगल्यांचो जबाब घेवप चालू आसा.
श्वेत गावडे हाणें आर्म काडून अकस्मात तन्वीचे दिकेन धरले आनी शूट करूं कांय नाका? अशें विचारले, आनी खिणांत गुळी सुटली आनी तन्वीचे मानेक लागून तें थंयच पडलें. ताका थंयच मरण आयलें. तन्वीची कूड पोस्टमॉर्टेमा खातीर हॉस्पिटलांत व्हेल्या. केपें पुलिसांनी केस नोंद केल्या. आर्म कायदेशीर आसा कांय ना, ताचो तपास तपासूय करतात.
सांखळे सावन काजूर-केप्यां पार्टी करपा खातीर वचप सगल्यांकूच म्हारग पडलें. श्वेत गावडे हाच्या कडेन आर्म आसा म्हूण वांगडच्यांक खबर आशिल्लें काय? हेंवूय पुलीस तपासतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
