भांगरभूंय | प्रतिनिधी
कामा खातीर हाडल्यात खास बिगर गोंयकार कामगार
भांगरभूंय । प्रतिनिधी
फोंडें: काजूमळ- मोल्यांचे दुदसागर न्हंयेंतली रेंव बेकायदो तरेन काडपाचें काम नेटान चालू आसा. बेकायदो तरेन रेंव काडचे खातीर बिगर गोंयकार कामगारांचो वापर चल्ला. गोंयांत बेकायदो तरेन रेंव काडपाक बंदी आसून लेगीत ह्या वाठारांत व्हड प्रमाणांत वेवसाय चालू आसा. हे खातीर हो लोकांचो चर्चेचो विशय जाला.
थळाव्या लोकांनी दिल्ले म्हायती प्रमाण पोरूं जेसीबी मशिनाचो वापर करून रेंव काडटाले. पूण अंदूं 15- 20 दिसां आदींच्यान रेंव काडपा खातीर खास बिगर गोंयकार कामगार हाडल्यात. दर दिसा सुमार 5-6 ट्रक रेंवेंची येरादारी करतात. कामगारांनी काडिल्लीं रेंव सकाळच्या वेळार जेसीबीच्या आदारान ट्रकांत भरतात. ही रेंव थातोड आनी कोडली- तिस्क मार्गा वयल्यान व्हरतात.
काजूमळ वाठारांतल्या निर्जन सुवातेर आशिल्ले न्हंयेंतले रेंवेची फाटल्या दोन वर्सां सावन येरादारी करतात. सध्या रेंव काडपा खातीर झारखंड आनी उत्तर प्रदेशांतल्या कामगारांक हाडल्यात. चेपणाक लागून थळावे लोक लेगीत हाचे आड आवाज काडपाक मुखार सरनात. रेंव काडपी कामगार न्हंयेदेगेर दनपारां रांदतात. एकादी अनोळखी व्यक्ती थंय गेली जाल्यार ते कामगार पिकनिकेक आयल्यात, अशें सांगतात. सुमार 30- 40 बिगर गोंयकार कामगार सद्दां सकाळीं ते सांज मेरेन न्हंयेंतल्यान बेकायदो तरेन रेंव काडटात. काजूमळ वाठारांतल्या दुदसागर न्हंयेदेगेर व्हड प्रमाणांत पर्यटक पिकनिके खातीर येतात. न्हंयेंतली रेंव काडिल्ल्यान पर्यटकांक उदकाचो अदमास येवपाक शकचो ना. ताका लागून हे न्हंयेंत न्हांवपा खातीर देंविल्ले पर्यटक बुडपाचो भंय आसा, अशें थळाव्या लोकांचें म्हणणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
