भांगरभूंय | प्रतिनिधी
मुंबय, खबरां संस्था ः काळखांत चकचकपी काजुले सगळ्यांनी पळयल्याच आसतलें. भुरगेपणांत काजुल्यांक धरून कंवचेच्या बाटलेंत वा फस्कांत दवरपाचोय यत्न केला आसतलो. भंडारदरा (महाराष्ट्र) दरवर्सां काजुलो उत्सव मनयता. पूण आतां आपल्या आंगांतल्यान उजवाड पातळावपी सैमाचो चमत्कार आशिल्लो ल्हानसो हो काजुलो नश्ट जावपाक लागला. रानांत लेगीत काजुल्यांचें अस्तित्व उणें जालां.
हाका लागून काजुल्यांचो आंकडो उणो…
बायो इंडिकेटर्सातलो एक काजुलो रातचो चमकता. हे सामके ल्हान आनी सपाट राखाडी रंगाचे किडे खूब सोबीत दिसतात. काजुलो पळोवपा खातीर भंडादरा हांगा काजुल्यांचो खाशेलो उत्सव जाता. पूण थंय लेगीत आतां तांचो आंकडो दिसानदीस उणो जायत आसा. ह्या किड्यांचे दोळे व्हड आनी पाखां ल्हान आसतात. दोन ल्हान पाखांच्या आदारान ते उडटात. काजुले जमनीपोंदा आनी झाडांच्या सालांत तांतयां घालतात. ते मुखेलपणान वनस्पत आनी ल्हान किडे खातात. काजुले पिकांक आनी फळां-भाजयांक किडीं पसून राखण दिता. पूण ह्या काजुल्यांक लेगीत आतां व्हड धोको निर्माण जाला. हाचें कारण म्हणल्यार प्रदुशण आनी पाचव्या झाडांचो आंकडो उणो जावप.
भारतीय वन्यजीव संस्था (Wildlife Institute of India) हे संस्थेन हाचेर संशोधन केलां. हे संस्थेच्या संशोधकांनी एसजीआरआर विद्यापिठाच्या मजतीन एक रिसर्च पेपर प्रकाशित केलां. दून देंगणांत केल्ल्या अभ्यासांत रानां परस शारांतल्या वाठारांनी काजुल्यांचो आंकडो तुळेन खूबच उणो आशिल्ल्याचें दिसून आयलें. वाडत वचपी प्रदुशणाक लागून आनी पाचवें रान नश्ट जाल्ल्यान काजुल्यांच्या अस्तित्वाचेर संकश्ट आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
