भांगरभूंय | प्रतिनिधी
फोंडें: काजरवाडो-बेतोडेंच्या राष्ट्रीय म्हामार्गा कुशीक परत जड वाहनां पार्क केल्ल्यान ह्या वाठारांत अपघात जावपाची शक्यताय वाडल्या. कांय म्हयन्यां आदीं काजरवाडो आनी बोणबाग गांवांतल्या दोगांक हांगा अपघातांत मरण आयिल्लें. ताका लागून रस्त्या कुशीक वाहनां पार्क करपी चालका आड कारवाय करपाची मागणी थळावे लोक करतात.
बायथाखोल-बोरी ते कुर्टी मेरेनच्या बगल रस्त्याचें रुंदीकरण सध्या नेटान सुरू आसा. मात काजरवाड्यावेल्या वोल्ताचेर रस्त्या कुशीक पार्क केल्लीं जड वाहनां अपघातांक आमंत्रण दितात. बोणबाग आनी काजरवाडो गांवचे लोक ह्याच रस्त्यावेल्यान चलत यो-वच करतात. तशेंच दोनूय गांवच्यो जायत्यो बायलो बेतोड्या उद्देग वसणुकेंत रस्त्यावेल्यान यो-वच करतात. ताका लागन अपघातांचो आंकडो वाडला. ह्यान पयलीं हांगा जायत्या जाणांक अपघातांत मरण आयलां. येरादारी पुलीस रस्त्या कुशीक पार्क करपी वाहन चालकां आड कारवाय करतात. मात हेर वाठारांनी वचपी वाहनां हांगाच पार्क करून चालक लागसारच्या हॉटेलांनी जेवण आनी च्या खातीर वतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
