भांगरभूंय | प्रतिनिधी
सांगें: काकोडें- कुडचडेंच्या कोयर प्रकल्पाचे कुशींतल्यान व्हांवपी एका व्हाळाच्या उदकांत मंगळारा शेंकड्यांनी नुस्तीं मेल्ले अवस्थेंत थळाव्या लोकांक दिशिल्लीं. तें नुस्तें खावचे न्हय म्हूण सादूर करपी बातमी ‘भांगरभूंय’न बुधवारा उजवाडाक हाडली. ताचो इफेक्ट जाल्ल्यान बुधवारा सकाळच्यान दनपार मेरेन व्हाळाच्या उदकाचे आनी मेल्ल्या नुस्त्याचे नमुने घेतले. ते नमुने प्रयोगशाळेंत धाडटले, अशें प्रदुशण नियंत्रण मंडळाच्या अधिकाऱ्यांनी सांगलें.
ह्या वेळार गोंय राज्य प्रदुशण मंडळाचे इंजिनियर राजमोहन प्रभू देसाय, गोंय कोयर वेवस्थापन म्हामंडळाचे सहाय्यक वेवस्थापक गजानन कामत, गोंय कोयर वेवस्थापन म्हामंडळाचे अभियंते किरण बुरुद, काकोडें प्रकल्प अधिकारी थंगराज ए., काकोडें प्लांट कॅमिस्ट सुभम पाटील आनी हेर अधिकारी हाजीर आशिल्ले. हे प्रक्रियेंतल्यान घेतिल्ले नमुने प्रकल्पांतले आसूं वा व्हाळाचे आसूं, पूण शेंकड्यांनी नुस्तें कशें मेले हाचो सोद लागप गरजेचें आसा. कोयर प्रकल्पांतल्यान काळें उदक कशें येता तें कळपाक जाय कारण हें काळें उदक व्हाळाक वचून मेळटा. हाची लेगीत चवकशी जावपाक जाय, अशी मागणी थळाव्या लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
