काकोडा-कुडचडेंच्या विशेश भुरग्यांच्या शाळे लागसार बेकायदेशीर सीएनजी सिलिंडराचो सांठो

भांगरभूंय | प्रतिनिधी

पणजी : काकोडा-कुडचडेंच्या विशेश भुरग्यांच्या शाळे लागसार आनी उद्देगीक प्रशिक्षण संस्थेच्या (आयटीआय) सामको लागींच आशिल्ल्या वाठारांत बेकायदेशीरपणान सीएनजी सिलिंडराचो सांठो केल्ल्या प्रकरणांत केपेंच्या उपजिल्लोधिकार्‍यांनी ’अदानी गॅस प्रायव्हेट लिमिटेड’ कंपनीक कारणां दाखयात नोटीस धाडल्या. ह्या प्रकरणाची खरसाण वळखून प्रशासनान कंपनीक ४८ वरां भितर स्पश्टीकरण दिवपाचे आदेश दिल्यात. विशेश म्हळ्यार, मंगळारा विधानसभेंत आमदार निलेश काब्राल हांणी हो मुद्दो सामको खरपणान मांडिल्ल्यान ही प्रशासकीय कारवाय जाली.
काकोडच्या सर्व्हे नंबर ९८/६त ही धोको निर्माण करपी कृती सुरू आशिल्ल्याची कागाळ ’चेतना एज्युकेशन सोसायटी’च्या विशेश भुरग्यांचे शाळे वतीन केल्ली. हे कागाळीची दखल घेवन उपजिल्लोधिकारी मनोहर कारेकार हांणी संबंदीत सुवातेची जोड पळोवणी करपाचे आदेश दिल्ले. हे पळोवणे मजगतीं धक्को दिवपी म्हायती मुखार आयली. हे सुवातेर सुमार १५० किलो तांकीचे सुमार २० सीएनजी सिलिंडर एके पायलोलायनीक जोडून वाटपा खातीर सज्ज दवरिल्ले. मात, ह्या पुराय प्रकल्पा खातीर गरजेचे आशिल्ले खंयचेच कायदेशीर परवाने, तखटे वा सुरक्षा प्रमाणपत्रां थंय दिसूंक ना.
प्रशासकीय तपासणेंत अशेंय स्पश्ट जालें, ह्या कामा खातीरं कुडचडे-काकोड्यां नगरपालिके वतीन कसलेच बांदकाम परवाने घेवंक ना. तशेंच जमनीच्या वापराचो बदल करपा खातीर गरजेचीं आशिल्लीं ’कन्व्हर्जन सनद’ मेळोवंक ना. सगल्यांत चिंतेची गजाल म्हळ्यार, हो सांठो करपा खातीर उजो पालोवपी दळाचो ना हरकत दाखलाय संबंदीतां कडेन उपलब्ध ना. जे मनीर हो प्रकल्प उबारला, ती जमीन कागदोपत्री ’श्री महादेव देवस्थान’च्या नांवार आशिल्ल्यान थंय अशे तरेचे घातकी काम सुरू जाल्ल्यान ह्या वाठारांत भंयाचें वातावरण निर्माण जालां.
हो सीएनजी सांठो जंय आसा थंयच्या ७५ मिटर अंतराचेर ’आयटीआय’ आशिल्ल्यान २५० मिटर अंतराचेर विशेश भुरग्यांची शाळा आसा. आयटीआयंत वेल्डिंग आनी इलेक्ट्रीक कामां सारकिल्ल्यो उद्देगीक प्रक्रिया सुरू आसात, जाका लागून ह्या गॅस सांठ्याक लागून स्फोट वा उज्याचो व्हड धोको निर्माण जावपाक शकता. विद्यार्थ्यांच्या आनी सामान्य जनतेचे जिणे कडेन खेळपी ह्या बेकायदेशीर प्रकरणाची दखल घेवन उपजिल्लोधिकार्‍यांनी भारतीय नागरीक सुरक्षा संहितेच्या कलम १६३ खाला ’अदानी गॅस’क नोटीस दिवन १३ मार्च २०२६ तारखेर सकाळीं ११ वरांचेर यंत्रणे मुखार हजर रावपाचे आदेश दिले. जर कंपनीन योग्य कागदपत्रां सादर करूंक ना, जाल्यार हो पुराय प्रकल्प काडून जमीन आदले भशेन करपाचे आदेश दितले, अशें प्रशासनान स्पश्ट केलें.