भांगरभूंय | प्रतिनिधी
स्मार्ट सिटीच्या अभियंत्यांनी कसलीच सुचोवणी दिवंक ना
भांगरभूंय । प्रतिनिधी
पणजीः स्मार्ट सिटीचीं कामां 31 मे पयलीं पुराय जातलीं अशें सांगिल्ले. पूण आतां फक्त दोन दीस उरल्यात. स्मार्ट सिटीची हातांत घेतिल्लीं कामां अजून पुराय जावंक नात. तातूंत बुधवारा सकाळीं अचकीत काकुलो जंक्शन रस्त्याच्या कामाक सुरवात केली. हें विशीं स्मार्ट सिटीच्या अभियंत्यांनी आदीं कसलीच सुचोवणी दिवंक ना. बुधवारा काकुलो जंक्शन येरादारी खातीर बंद केलें. हाका लागून लोकांक खूब त्रास जालो. मधुबन सर्कल सावन बालभवन ते काकुलो जंक्शन मेरेन वचपी रस्त्यांचेर येरादारीची कोंयडी जाली.
स्मार्ट सिटीच्या कामांची मुजत 31 मेक सोंपता. विवांता जंक्शन ते शितल हॉटेल, शितल हॉटेल ते काकुलो मॉल आनी शितल हॉटेल ते मधुबन जंक्शन रस्ते येरादारी खातीर मंगळारा रातीं उक्ते जाले. पूण बुधवारा सकाळीं काकुलो जंक्शन अचकीत येरादारी खातीर बंद केले. हाचे आदीं रस्तो बंद करतना स्मार्ट सिटी वतीन सुचोवणी तकटे लायताले वा कळीत करताले. हाचे प्रमाण रस्तो सुरू जाता थंय लेगीत मधुबन जंक्शन आनी शितल हॉटेल कडेन काकुलो जंक्शन येरादारी खातीर बंद आशिल्ल्याचे तकटे लावप गरजेचें आशिल्लें. पूण ह्या रस्त्यांचेर अशे तरेचे तकटे लावचे बदला काकुलो जंक्शना लागसार लायले. ताका लागून त्या रस्त्या वयल्यान यो वच करप्यांक तो रस्त बंद आसा हें कळूंक ना. देखून जायत्या लोकांक काकुलो जंक्शन मेरेन येवन परतून वचचें पडलें. जाल्यार काकुलो लागसार वाठारांतल्या लोकांनी काकुलो ते बालभवन रस्त्या कुशीक गाडयो पार्क करुन थंयच्यान चलत आपल्या सुवातींनी गेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
