भांगरभूंय | प्रतिनिधी
खाजगी जमनीचेर बांदकाम करपाची वृत्ती बंद करची
गोंयचो एकवोटचे ओलंसियो सिमोयशाची शिटकावणी
वास्को: कसलीच परवानगी घेनासतना, कसलींच कागदपत्रां नासतना कांसावले एका भाटकाराचे जमनींत रेल विकास निगम लिमिटेडाच्या कंत्राटदारान सुरू केल्लें काम गोंयचो एकवोट आनी थळाव्या लोकांनी बंद उडयलें. रेल विकास निगम लिमिटेडान खाजगी जमनीचेर आपलें बांदकाम उबारपाची वृत्ती बंद केली ना जाल्यार गांवच्या लोकांक रस्त्यार देंवचें पडटलें अशी शिटकावणी गोंयचो एकवोटचे ओलंसियो सिमोयश हांणी दिली.
कांसावले गांवांतल्यान दोट्टी रेल्वे मार्ग व्हरपाक गांवच्या लोकांचो विरोध आसा. रेल्वे मार्गा कुशीक आशिल्ली सुवात ही खाजगी आसा. ताचेर दक्षीण अस्तंत रेल्वेचो कसलोच अधिकार नाशिल्ल्याचो दावो गांवचे लोक करतात. हे संबंदीचो वाद न्यायालयांत प्रलंबीत आसा. पूण रेल विकास निगम लिमिटेडच्या कंत्राटदारा वतीन रेल्वे मार्गा कुशीच्या जमनीचेर बांदकाम करपाचो यत्न जाता. दरेक फावटी गांवचे लोक एकठांय जावन हें काम बंद उडयतात.
मंगळाराय रेल विकास निगम लिमिटेडच्या कंत्राटदारान कांसावले रेल्वे मार्गा कुशीक सिमेंटाचो चौथरो तयार करून ताचेर जंक्शन बॉक्स उबारपाचो यत्न चलयिल्लो. हे संबंदीची म्हायती मेळटकूच गोंयचो एकवोट आनी गांवकार थंय एकठांय जाले आनी तांणी तें काम बंद उडयलें. तशेंच जंक्शन बॉक्सा संबंदीचें सामान थंय सावन हालोवपाक सांगलें. ते प्रमाण कामगारांनी तें सामान थंय सावन हालयलें. ह्या कामा विशीं गांवच्या लोकांनी तिडक उक्तायल्या.
हाचे पयलींय रेल विकास निगम लिमेटेडान एका भाटकाराच्या जमनी वयले माड कापिल्ले. आतां जंक्शन बॉक्स उबारचे पयली संबंदीत भाटकाराक कसलीच पूर्व सुचोवणी दिनासतना वा परवानगी घेनासतना थंय काम सुरू केल्लें अशें शिमोयश हांणी सांगलें. ह्या प्रकरणांत जिल्होधिकारी आनी गोंय सरकारान दखल घेवपाची गरज तांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
