भांगरभूंय | प्रतिनिधी
पणजी : काणकोण म्हालांतल्या आंगोदचे दर्यादेगेर दरवर्सा जायत्या दर्मीळ प्रजातीचे ऑलिव्ह रिडले कांसव तांतयां घालपा खातीर येतात. मजगतीं, ह्या वाठारांत कांय वेवसायीक आस्थापनांय आसात. आवाजाचें प्रदुशण आनी हेर कारणांक लागून हांगा येवपी कांसवांक आनी तांच्या तांतयांक त्रास जावपाची शक्यताय आसा. हीं आस्थापनां बंद करचीं हाचे खातीर उच्च न्यायालयांत एक याचिका दाखल केल्ली. आयज ताचो निकाल लागलो. ह्या अतिसंवेधनशील भागांत कार्यरत आशिल्ले वट्ट ६७ वेवसायीक आस्थापनांक २४ वरांनी बंद करपाचे आदेश उच्च न्यायालयान आयज दिल्यात.
मजगतीं, फाटीं उच्च न्यायालयाच्या आदेशा प्रमाण, आगोंद दर्यादेगेर आशिल्ल्या १७ शॅकांचेर मंगळारा कुलूप लावपाची कारवाय केली. १७ मदल्या ५ शॅक्स वाल्यांनी आपलीं शॅकां कारवाये पयलींच काडचीं. जाल्यार उरिल्ल्या १२ शॅकांक कुलूप घातलें. दर्यादेगां वयल्या १७ शॅकांनी प्रदूशण नियंत्रण मंडळाचो दाखलो घेवंक नाशिल्लो. उच्च न्यायालयान प्रदूशण नियंत्रण मंडळाचो परवानो घेवंक नासतना वेवसाय केल्ल्याचो थपको मारून सगल्या शॅकांक कुलूप मारपाचे आदेश दिल्ले.
सैमीक चक्र थारनासतना चलत रावचें, ह्या कांसवांक कसलेच तरेची दुखापत जावची न्हय हाचे खातीर रान खातें आनी जायत्या जनावर मोगीं कडल्यान जायत्यो मोहिमो राबयतात. हांगा कांसव संवर्धन वाठार निर्धारीत केल्ल्यान हो वाठार अती संवेदनशील म्हणून घोशीत केला. मात जायते फावटीं निर्धारीत कायदे आनी नेम हांगा कार्यरत आस्थापनां मोडटना दिसतात. उच्च न्यायालयाच्या ह्या निर्णयाक लागून हे प्रकार आतां बंद जातले अशी आस्त कांय जनावरां मोगींनी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
