भांगरभूंय | प्रतिनिधी
पॅरीस ऑलिप्मीक भारता खातीर ‘कांशें’ ऑलिम्पीक थारलें. पांच कांश्या पदकां सयत वट्ट स पदकांची भारतीय खेळगड्यांची काल-पयरूच पॅरिसांत सोंपिल्ल्या ऑलिम्पिकांतली जोड. भालो फेकींत फाटल्या ऑलिम्पिकांत जोडिल्लें भांगरा पदक व्हगडावन नीरज चोप्रान जिखिल्लें एकसुरें रुप्या पदक. टोकियो ऑलिम्पीकाचे तुळेन आमी एका भांगरा पदकान फाटीं पडले. 140 कोटी लोकसंख्या आशिल्ल्या भारताक अंदूंच्या ऑलिम्पिकांत हाचे परस चड अपेक्षा आमच्या खेळगड्यां कडल्यान आसतना आमी नेकमे खंय उणे पडले हाचो विचार करचो पडटलो. टोकियो ऑलिम्पिकांत आपले कामगिरीचो विचार करीत ह्या वेळार आमकां एकूय भांगरा पदक मेळोवंक येवंक नासलें तरी वट्ट कामगिरी कांय प्रमाणांत बरी जाल्ल्याचें दिसून आयलें. मात्सो नशिबाचो सांगात मेळिल्लो जाल्यार निश्चीत आनीक चार ते पांच तरी कांश्यां पदकांची भर पडटली आसली. एखादें भांगरा पदकूय मेळपाचें, पूण तशें जालें ना आनी स पदकांचेरूच समाधान मानपाची वेळ आमचेर आयली. आतां मेरेनच्या ऑलिम्पिकांत आमच्या खेळगड्यांच्या प्रवासांतले कामगिरीचो आलेख तसो चडोच राविल्ल्यान सामके निरशेवपाचें कारण नासलें तरी देशांत आतां खेळां मळार ज्या उंचेल्या दर्ज्याच्यो आंतरराष्ट्रीय सुविधा आमच्या खेळगड्यां खातीर उपलब्ध करतात, तें पळयत जाल्यार ऑलिम्पिकांत भारतीय खेळगड्यांचे ‘भांगर’ पर्व सुरू जावपाची अपेक्षा आमी सगलेच बाळगून आसात. 2036 वर्सा भारतांत ऑलिम्पिकाचें आयोजन करपाचो शिवधोनू आमी उबारिल्लो आसतना तो मेरेन निदान आमी व्हड झोपय मारतले? हो एक खरो प्रस्न आसा.
खेळां मळार व्हड झोपय मारपाचे दिशेन भारताची वाटचाल चालू आसा, हातूंत कसलोच दुबाव ना. आमच्या खेळगड्यांनी आशियाई, राष्ट्रकूल बी खेळां सर्तींनी फाटल्या कांय वर्सांत जी दोळे दिपकावपी कामगिरी केल्या, ताचेर नदर भोंवडायत जाल्यार ऑलिम्पीक आमचे खातीर आतां हाताभायर ना अशें म्हणूंक येवचें ना. अजून मात्सो नेट धरीत जाल्यार ‘भांगर’ ऑलिम्पिकाचे सपन साकार जावपाक आमकां चड वेळ वाट पळोवची पडची ना. पॅरीस ऑलिम्पिकांत लागीं पावून लेगीत पांच ते स कांश्यां पदकां व्हगडायिल्लीं होच आमकां संदेश दितात. कांशें न्हय जाल्यार भांगर ऑलिम्पिकाचे प्रतिक्षेंत आयज आमी सगले आसात. भारतांत ऑलिम्पिकाचें आयोजन जायमेरेन आमच्या खेळगड्यां खातीर ‘भांगर’ मार्गूय सांपडटलो हाची आशा देशांत खेळाच्या विकासा खातीर सरकारान आयज जो हात मेकळो सोडला तें पळयत जाल्यार निश्चीतपणान बाळगूं येता. आमचे कडेन प्रतिभासंपन्न खेळगड्यांचो उणाव आसा अशें म्हणूंक येवचें ना. पूण अशा खेळगड्यांचो सोद घेवन ताचेर कश्ट घेवपाची गरज आसा, आनी ते खातीर राष्ट्रीय पांवड्यार खेलो इंडिया सारक्या कार्यावळी खाला जें काम चालू आसा तें पळयत जाल्यार बरो दीस लेगीत फुडारांत उजवाडले बगर रावचो ना हाची खात्री दिसता. पॅरीस ऑलिम्पिकांत हॉकीचें कांश्या पदक मेळोवन दिवपाक व्हड योगदान दिवपी भारतीय पंगडाचो गोलकिपर पी. श्रीजेशन हाणें जें विधान केलां तें खूब म्हत्वाचें आसा. आमचे कडेन आतां खेळांतल्यो सर्वश्रेश्ठ सुविधा उपलब्ध नात अशी सबब दिवन अपेसाचेर पांगरूण घालपाचे दीस आतां उरिल्ले नात. ह्या ताच्या विधाना वेल्यान देशांतले खेळ सुविधांचो नवो आंतरराष्ट्रीय दर्जो दिसून येता.
पांच दसका उपरांत पयलेच फावटी आमच्या हॉकी पंगडाक फाटोफाटच्या ऑलिम्पिकांत पदक जोडूंक जमलें हें येस सादें म्हणूंक येवचें ना. ते खातीर हो पंगड खरोच अभिनंदनाक पात्र आसा. ऑलिम्पिकांत पदक मेळोवपा खातीरची वाट तशी सादी, सोंपी आनी सरळूय ना. पूण ल्हवू ल्हवू आसूं आमच्या खेळगड्यांक ही वाट दिसूंक लागल्या आनी ती गजाल खूब म्हत्वची थारची. खेलो इंडिया ह्या राष्ट्रीय पांवड्या वेल्या कार्यावळी खाला पुराय देशांतल्यान गुणेस्त, प्रतिभासंपन्न खेळगड्यांक प्रोत्साहन दिवपाचें जें काम हातांत घेतलां ताका येस येवपाचे संकेत मेळत आसात आनी उज्जवल भवितव्याचे नदरेन ताचे कडेन पळोवं येतलें. ऑलिम्पिकाचें पोडियम नदरे मुखार दवरूनच अशा खेळगड्यांक प्रशिक्षण दिवप, उंचेल्या दर्ज्याच्यो साधनसुविधा उपलब्ध करून दितना प्रतिभासंपन्न खेळगड्यां कडल्यान तशीच कामगिरी करून घेवपाचे कटाक्ष आशिल्ल्यान लागींच्या काळांत ऑलिम्पिकांतल्या खूबशा खेळां प्रकारांत भारतीय खेळगडे चीन, अमेरिका, जपान ह्या सारक्या देशांच्या खेळगड्यांक आव्हान दितनाचे चित्र आमी पळोवंक शकूं. राष्ट्रीय खेळां गुणवत्ता संशोधन येवजणे खाला देशाच्या खांची कोनश्यांतल्यान गुणेस्त खेळगड्यांचो सोद घेतात, आनी आमचे कडेन गुणवत्ता कमी ना हें वेळावेळार सिद्ध जालां. कांय लाख लोकसंख्या आशिल्ले खूबशे ल्हान देश ऑलिम्पिकांत भांगरा पदकाची कामगिरी करतना आमी पळयतात तेन्ना 140 कोटींच्या आमच्या देशांत हें कित्याक घडून येना हो प्रस्न मुखार उबो रावता, आनी तातूंतल्यानूच ऑलिम्पीक पोडियमा मेरेन खेळगड्यांक व्हरपाचो हो मार्ग आतां उक्तो जाला.
कुस्तींत विनेश फोगटाक नशिबाचो सांगात मेळ्ळो ना. तिचें हक्काचें रुप्या पदक न्यायालयांतल्यान तिका आयज मेळत जाल्यार कांय प्रमाणांत तिका न्याय मेळिल्ले भशेन जातलो. पूण हातूंतल्यानच कुस्ती खेळगड्यांक, मागीर ती बायलां आसूं वा दादले बरो धडो मेळ्ळो. फुडारांत अशे तरेची पुनरावृत्ती जावची ना हाची आस्त बाळगूं येतली. ऑलिम्पिकाचे येजमानपद भारताक मेळटलें हें लागीं लागीं निश्चीत जाल्लें आसतना, फुडल्या धा वर्सांत आमकां खूब कश्ट घेवचे पडटले. खेलो इंडिया चमत्कार घडोवन हाडपा खातीर धडपडत आसा. ह्या कार्यावळी खाला 2500 कोटी रुपयां परस चड रक्कम खेळगड्यांचे प्रशिक्षण आनी अर्थीक मजत हे खातीर उपलब्ध करून दिल्ल्याचें सांगतात. खेळगडे, तांच्यो संघटणा कोणाकूच आयज कागाळ करपाक सुवात ना हें खरें आसलें तरी खेळा मळार दिसून येवपी राजकारणूच मुखेलपणान खेळाचो विकास आडावपाक कारण थारत आसा हें कोणूच न्हयकारूंक शकचो ना. कुस्ती म्हासंघांत कितें घडलें हें जाल्यार नव्यान सांगपाची गरज ना. ऑलिम्पीक आयोजनाचें सपन बाळगितना हें सगलें टाळप गरजेचें आसा. ऑलिम्पिकूच भारतांतल्या खेळां विकासाक चड चालना दिवंक शकतलें. भारतान ऑलिम्पिकाचें आयोजन करचें? हो लेखाचो स्वतंत्र विशय थारूंक शकता. पूण ह्या देशांत खेळां संस्कृती रुजोवपाची आसत जाल्यार ऑलिम्पीक आयोजना बगर पर्याय ना हेंवूय तितलेंच खरें. खेळां मळार नवी झोपय मारपा खातीर आमी तयार आसात. पूण ते खातीर ऑलिम्पिकाचो मोटो तळ उपलब्ध आसत जाल्यारूच तें शक्य जातलें.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
