कांय शिक्षकांक ‘नीट’, ‘जेईई’ खबरूच ना

भांगरभूंय | प्रतिनिधी

करियर गायडन्स कार्यावळींत मुख्यमंत्र्यान उक्तायलो हुस्को

भांगरभूंय | प्रतिनिधी

पणजी : कांय उच्च माध्यमीक शिक्षकांक ‘नीट’, ‘जेईई’ हें कितें तें खबरूच ना. ही हुस्को करपा सारकी गजाल. अशे स्थितींत ते विद्यार्थ्यांक कितें शिकयतले? असो प्रस्न मुख्यमंत्री डॉ. प्रमोद सावंत हांणी एससीईआरटीचे करियर गायडन्स कार्यावळींत उपस्थीत केलो.

डॉ. सावंत हांचे हस्तुकीं गोवा करियर नेव्हीगेटर- 2025 हे करियर गायडन्स कार्यावळीचें कला अकादमींत उक्तावण जालें. राज्य शिक्षण संशोधन आनी प्रशिक्षण परिशद (एससीईआरटी) हांणी युनोक्यू प्रो इड्युटेक हांच्या जोडपालवान ही कार्यावळ घडोवन हाडिल्ली. ह्या वेळार एससीईआरटीची संचालक मेघना शेटगांवकार, शिक्षण संचालक शैलेश झिंगडे, तांत्रिकी शिक्षण संचालक डॉ. विवेक कामत, युनोक्यूचे संस्थापक धवल गांधी, राहील शहा आनी हेर मानेस्त हजर आशिल्ले.

गोंयांत खूबशे भुरगे जेईई आनी नीट परक्षेंत टॉप करतात. तशेंच खूबश्या भुरग्यांक जेईई आनी नीट कितें हे खबर लेगीत ना. हे खातीर हांव पालकांक न्हय जाल्यार शिक्षकांक जापसालदार धरतां, अशें मुख्यमंत्र्यान विद्यार्थ्यांक मार्गदर्शन करतना सांगलें.
यत्ता बारावेंत शिकपी भुरग्यान जेईई परिक्षा दिवंक नाशिल्ल्यान तांकां आभियांत्रिकी महाविद्यालयांत प्रवेश घेवपाची संद चुकली. जेन्ना ताका जेईई परिक्षा कित्याक दिवंक ना अशें विचारल्यार, अभियांत्रिकी शिक्षण घेवप गरजेचें आसा हें ताका खबर लेगीत नाशिल्लें, अशें मुख्यमंत्र्यान सांगलें.

हे परिक्षे विशीं म्हायती दिवप हें उच्च माध्यमीक शिक्षकांचें काम. मात चडश्या शिक्षकांक जेईई आनी नीट परिक्षा कितें हाची कसलीच म्हायती ना, हें आयकून म्हाका तांचें चुरचुरें दिसता. जर तांकां हे विशीं कसलीच म्हायती ना जाल्यार हे शिक्षक शिकयतले तरी कितें? कोणतरी येवन तुमकां सांगतलो म्हणून कोणचेरूच पातयेवन रावूं नाकात, असो सल्लो मुख्यमंत्र्यान विद्यार्थ्यांक दिलो. फुडलीं 70 ते 80 वर्सां आमकां रावपाक जाय जाल्यार आतां कितें करप हें विशीं निर्णय घेवचो पडटलो. देखून सरकार तुमचें करीअर घडोवपा खातीर धडपडटा. करियर मार्गदर्शन हें शिक्षणीक धोरण वा अभ्यासक्रमाचो भाग ना. तुमची कुशळटाय आनी आवडी प्रमाण तुमचें करियर आतां घडोवपाक जाय, ताची सुरवात करपाक जाय, असो मुख्यमंत्र्यान विद्यार्थ्यांक उलो मारलो.