भांगरभूंय | प्रतिनिधी
मुख्यमंत्री : विज्ञान सेतू उपक्रमाचें उक्तावण
भांगरभूंय । प्रतिनिधी
पणजीः कांय जाण आपले सोयी खातीर एप्रीलांत शिक्षणीक वर्स सुरू करपांक विरोध करतात. हो निर्णय आमी पालक आनी शिक्षकां खातीर न्हय जाल्यार विद्यार्थ्यांचे एकंदर उदरगती खातीर घेतला. एप्रीलांत अभ्यासक्रमांक सुरवात केल्यार मदले म्हयने भुरग्यांच्या खेळां अभ्यासक्रमा खातीर वापरपाक मेळटले, अशें मुख्यमंत्री डॉ. प्रमोद सावंत हांणी सांगलें.
मिरामारच्या गोंय विज्ञान केंद्रांत मुख्यमंत्री डॉ. सावंत हांचे हस्तुकीं विज्ञान सेतू उपक्रमाचें उक्तावण जालें. ह्या वेलार शिक्षण सचीव प्रसाद लोलयेंकार, शिक्षण संचालक शैलेश झिंगडे आनी हेर मानेस्त हाजीर आशिल्ले. विज्ञान सेतू उपक्रमा खाला शालेय विद्यार्थ्यांनी प्रदर्शन घडोवन हाडिल्लें.
आमी शाळेंत आनी शिक्षणांत भुरग्यांक कितें जाय हाचेर विचार करतात. तांचो गरजो लक्षांत दवरून तांचे एकदंरीत उदरगती खातीर तांचो अभ्यासक्रम बदलून एप्रीलांत शिक्षणीक वर्स सुरू करतात, अशें मुख्यमंत्र्यान सांगलें.
पालकांक वा शिक्षकांक कितें जाय तें करपा खातीर हो निर्णय न्हय. शाळांनी येवन पदवी घेवप ही विद्यार्थ्यांची उदरगत न्हय. तांची उदरगत जातली जाल्यार विद्यार्थ्यांनी राष्ट्रीय खेळांत आनी ऑलिंपिकांत वांटेकार जावन तांकां पदकां मेळचीं म्हूण आमी विचार करतात. हें करतले जाल्यार आमकां म्हाल पांवड्यार प्रशिक्षण केंद्रां आनी वेळ दिवचो पडटलो, अशें मुख्यमंत्र्यान सांगलें.
जी साधन सुविधा राष्ट्रीय खेळां वेळार तयार जाल्ली तांचो वापर विद्यार्थ्यांनी प्रशिक्षणा खातीर करपाक जाय. ते करतले जाल्यार दीस थारावन म्हाल पांवड्यार खेळ आनी सर्ती घडोवन हाडच्यो पडटल्यो. राष्ट्रकूल खेळांत जे खेळ येतात तांकां आतां सावन प्रशिक्षण दिवपाक सुरवात करची पडटली, अशें मुख्यमंत्र्यान म्हणलें. हें साध्य करपा खातीर ऑक्टोबर, डिसेंबर, नोव्हेंबर हो खासा वेळ खेळांत भुरग्यांक प्रशिक्षण दिवपा खातीर दिवचो पडटलो. एक थारावीक वेळ प्रशिक्षणाक दिवपा खातीर आमकां शिक्षणीक वर्स एप्रीलांत हाडचें पडटा. खूब जाण आपले सोय पळोवन विरोध करपाक लागल्यात, पूण आमी भुरग्यांच्या फुडाराचो आनी ते फुडें कशे घडटले हाचो विचार करतात. देखून सगळ्या पालकांनी आनी शिक्षकांनी सहकार्य करपाक जाय, असो उलो मुख्यमंत्र्यान मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
