भांगरभूंय | प्रतिनिधी
पणजीः कांय जाण आपले सोयी खातीर एप्रिलांत शिक्षणीक वर्स सुरु करपाक विरोध करतात. हो निर्णय आमी पालक आनी शिक्षिकां खातीर न्हय तर विद्यार्थ्यांचे एकंदर उदरगती खातीर घेतला. एप्रील म्हयन्यांत अभ्यासक्रमांक सुरवात केल्यार मदले म्हयने भुरग्यांच्या खेळा अभ्यासक्रमा खातीर वापरपाक मेळटले, अशें मुख्यमंत्री डॉ. प्रमोद सावंत हांणी सांगलें.
गोंय विज्ञान केंद्रांत डॉ. सावंत हांचे हस्तुकीं विज्ञान सेतु ह्या उपक्रमाचें उक्तावण जालें. शिक्षण सचीव प्रसाद लोलयेंकार, शिक्षण संचालक शैलेश झिंगडे आनी हेर मानेस्त हजर आशिल्ले. विज्ञान सेतु उपक्रमा खाला शालेय विद्यार्थ्यांनी प्रदर्शन घडोवन हाडिल्लें.
ह्या वेळार उलयतना डॉ. सावंत हांणी सांगलें, शाळा फकत डिग्री घेवपा पुरती मर्यादीत ना. विद्यार्थ्यांचे एकदंरीत उदरगती खातीर आसा. एप्रिलांत अभ्यासक्रम पालकांक आनी शिक्षकां खातीर सुरू करिनात ते विद्यार्थ्यांचे उदरगती खातीर सुरू करतात. तालुको पांवड्यार आमी विद्यार्थ्यांक राष्ट्रीय पांवड्यावेल्या खेळां खातीर तयार करपाचे थारायलां. जी सुविधा राष्ट्रीय खेळां वेळार तयार जाल्ली तांचो वापर विद्यार्थ्यांनी तालुको पांवड्यावेल्या खेळां खातीर करपाक जाय, अशें मुख्यमंत्र्यान सांगलें.
जर एप्रिलांत अभ्यासक्रम सुरू केलो जाल्यार ऑक्टोबर, डिसेंबर, नोव्हेंबर हे तीनूय म्हयने आमकां विद्यार्थ्यांक विवीध खेळांत प्रशिक्षण दिवपाक समर्पीत करपाक मेळटले आनी शाळेची एकदंरीत उदरगत जातली. आपले सोयी खातीर कांय जाण हाका विरोध करतात. पूण आमी फुडाराची उदरगत लक्षांत दवरून विचार करतात, अशें मुख्यमंत्र्यान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
