भांगरभूंय | प्रतिनिधी
‘तिऱ्हाईत’ संदर्भांतल्या प्रकारा वेल्यान नाट्य मळार संमिश्र प्रतिक्रिया
पणजी: कला अकादमीच्या ‘अ’ गट नाट्य सर्तींत दर्जेदार थारून लेगीत मांगिरीश यूथ क्लबान केल्ले एके चुकीक लागून तांचे ‘तिऱ्हाईत’ नाटक निकालांतल्यान भायर पडलें. हे खातीर सर्तीचो निकालूय बदल्लो. ह्या प्रकारा वेल्यान नाट्य लेखक, दिग्दर्शक, कलाकार आनी रसिकां कडल्यानूय संमिश्र प्रतिक्रिया उमठत आसात.
हे विशीं ‘भांगरभूंय’न ‘तिऱ्हाईत’चे दिग्दर्शक दक्षा शिरोडकार हांचे कडेन संपर्क सादलो तेत्ना तांणी म्हणलें. कला अकादमीच्या घटनेतले नेम क्रमांक 16 प्रमाण ‘ब’ गटांतल्या कलाकाराक ‘अ’ गटांतल्या नाटकांत काम करूंक मेळना. पूण आमचे कडल्यान ह्या वर्सा ती चूक जाली. ते खातीर माफिनामोय अकादमीक सादर केलो. ह्या नेमाचें फाटल्या खूबशा वर्सां सावन उक्तेपणान उल्लंघन जायत आशिल्ल्याचें खूबशा जाणांक खबर आसा. तरी लेगीत हो नेम ह्या वर्सा इतलो म्हत्वाचो कित्याक जालो? असो प्रस्न उपस्थीत करून हो न्याय न्हय, जाल्यार निश्ठावान आशिल्ल्यांचो त्याग आशिल्ल्याची भावना तांणी उक्तायली.
कला अकादमी वतीन आयोजीत ‘अ’ आनी ‘ब’ गट नाट्य सर्तीचो उद्देश हो गोंयांतल्यान चडांत चड कलाकार तयार जावचे होच आसा. सर्ती खातीर नेम आसप गरजेचेंच आसा. त्याच नेमाचो भंग करून फाटल्या वर्सा गरजे परस उणीं नाटकां सर्तींत आसून लेगीत दोन नाटकां निमाण्या सर्ती खातीर धाडून दिली. कलाकारांक प्रोत्साहन दिवपा खातीर कला अकादमीन घेतिल्लो हो निर्णय म्हाका आवडलो. तसोच निर्णय ह्या वेळार ‘तिऱ्हाईत’ खातीर घेवप अपेक्षीत आशिल्लें. कारण ती तांचे कडल्यान नकळटां चूक जाल्ली अशी प्रतिक्रिया नामनेचे गोंयकार चित्रपट दिग्दर्शक साईनाथ परब हांणी दिली.
कायदो आनी नेम सगल्यांक समान आसप हें लोकशायेचें मुलतत्व आसा. मांगिरीश यूथ क्लबान नेमाचो भंग केला. ते खातीर तांकां निकालांतल्यान भायर काडप चुकीचें ना. पूण, नेमाक पाळो दिवपा खातीर वास्तवाचे संदर्भ लक्षांत घेतल्यार हो प्रकार भौशीक जिणेंतली दांभिकता आनी अधःपतनाचें उदाहरण आशिल्ल्याचें नाट्य कलाकार नारायण खराडे हांणी म्हणलें.
‘तिऱ्हाईत’ नाटका विशीं जें कितें घडलें, ताका निकाला वेळार कला अकादमी माफ करूंक शकताली. पूण तशें कांय घडलें ना. पूण अशे प्रकार हाचे मुखार घडचे न्हय हाची दक्षताय घेवप गरजेचें आसा. कला अकादमीच्या कायद्यांतले नेम 16 योग्यूच आसा. ताका लागून नव्या कलाकारांक ‘ब’ गटांत स्वताक सिद्ध करचें पडटा, तांकां तातूंतल्यान योग्य ती माची मेळटा अशें नाट्य लेखक साई पाणंदीकार हांणी म्हणलें.
मांगिरीश यूथ क्लबा कडल्यान चूकच: गंवस
कला अकादमीच्या नेमा प्रमाण मांगिरीश यूथ क्लबान केल्ली चूक ही चूकच आसा. तांची ही चूक गृहीत धरूंकच जाय. नाट्य सर्तींत हाचे मुखार अशे प्रकार घडचे न्हय, हाची कला अकादमीन दक्षताय घेवप गरजेचें आसा अशें मत नाट्य लेखक सतीश गंवस हांणी उक्तायलें. एखाद्या कलाकारान दोनूय गटांत काम केल्यार गोंदळ जावंक शकता. ताका लागून नेम 16 म्हत्वाचो आसा अशें तांणी स्पश्ट केलें.
नट्यरसीक संदेश प्रभुदेसाय म्हणटात…
1. कला अकादमीच्या नाट्य सर्तींत घोळ घाला तो परिक्षकांनी. ‘ब’ गटांतल्या नाटकांत काम केल्ल्या एका कलाकारान ‘अ’ गटांतल्या ‘तिऱ्हाईत’ नाटकांत काम केलें. तातूंत ताणें एकूय संवाद नाशिल्ली (‘अ’ गटांत एकदाच सुण्याक उलो मारपाचें सोडून) कोरसांतलें सामकें नगण्य पात्रां रंगयल्यांत.
2 खंयच्याय कलाकाराक (तंत्रज्ञा सयत) खंयच्याय एकाच गटांतल्यान आनी एकूच नाटकांत वांटेकार जावंक मेळटलें अशा नेमावळीचें 16 वें कलम सांगता. हेर कितल्याशाच नेमांनी खंयचो नेम मोडल्यार नाटक अपात्र थारायतले तें स्पश्टपणान नमूद केलां. पूण 16 व्या कलमांत तशें कांयच सांगिल्लें ना.
3. हातूंतलो खंयचोय नेम मोडल्यार नाटक अपात्र थारायतले असो सर्वसादारण नेमूय ना. तेन्ना ह्या नेमभंगा खातीर पुराय नाटकूच अपात्र करप परिक्षकांचेर बंधनकारक नाशिल्लें. तशेंच नेम क्रमांक 32 प्रमाण ‘सर्तींतलीं विद्यमान सगलीं इनामां दिवचीं वा दिवचीं न्हय हे संबंदीचो निर्णय परिक्षक मंडळाच्या शिफारसीचेर निंबून आसतलो’ अशें सांगलां. ताका लागून चडांत चड ह्या दोनूय गटां मदीं आशिल्ल्या त्या कलाकाराक इनामांचे वळेरेंतल्यान वगळावन परिक्षक निकाल दिवंक शकताले. पुराय नाटकूच अपात्र थारावपाची कसलीच गरज नाशिल्ली.
4. खंयचोय नेम परिपूर्ण नासता. ताका लागून न्यायालयां राज्यघटनेतल्या कलमांचोय कालांतरान अन्वयार्थ लायतात. तसो अन्वयार्थ लावन परिक्षक सगल्या नाट्यप्रयोगांनी न्याय दिवंक शकताले. हांगा परिक्षकांनीच अन्याय केला अशें म्हाका प्रामाणीकपणान दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
