भांगरभूंय | प्रतिनिधी
सुण्याचे धनणी आड गुन्यांव नोंद
म्हापशें: बामणवाडो, कांदोळे 51 वर्सा पिराय आशिल्ल्या बायलेच्या पांयाक पोशिल्ल्या सुण्यान घांस मारपाचो प्रकार घडलो. ह्या प्रकरणांत कळंगूट पुलिसांनी सुण्यांची धनीण इशिता कटयाळ (52) हिचे आड गुन्यांव नोंद केला. दुबावीत बायल ही दृश्टी लायफ सेव्हींग कंपनीची डॉग स्कॉड वेवस्थापक आसा.
ही घडणूक शेनवारा सकाळीं 8.20 मिणटांच्या सुमाराक घडली. ह्या प्रकरणांत संगीता दसनसट्टी (रा. बामणवाडो, कांदोळे, मूळ बेळगांव) हांचो पूत गिरीश दसनसट्टी हाणें पुलिशेंत कागाळ नोंद केल्या.
दुबावीत बायल ही इमारतीच्या तळमाळ्यार आपल्या विदेशी जातीच्या सुण्याक घेवन पासय मारताली. त्याच वेळार शेजारची जखमी संगीता ही आपले कुडीचे कुशीक आशिल्ली. दुबावीत बायलेन निश्काळजीपणान सुण्याक सोडलो. ताका लागून ताणें धांवत वचून जखमीच्या पांयाक घांस मारलो. रोखडीच जखमीक कांदोळे भलायकी केंद्रांत व्हेली आनी थंय तिचेर उपचार करून घरा धाडून दिली.
ह्या प्रकरणांत पुलिसांनी भारतीय न्याय संहितेच्या 125 (अ) आनी 291 कलमा खाला दुबावीत बायले आड गुन्यांव दाखल केला. फुडलो तापस पुलीस निरिक्षक परेश नायक हांच्या मार्गदर्शना खाला उपनिरिक्षक साहील वायंगणकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
