भांगरभूंय | प्रतिनिधी
पुलिशेंत एकामेकां आड गुन्यांव नोंद
म्हापशें: फ्लॅटवजा व्हिला आवडूंक नाशिल्ल्यान परतून वचपी कल्याण ठाणें हांगासरलो पर्यटक गट आनी सुरक्षा रक्षकां मदीं मुतिल्ल्याच्या ल्हानशा कारणा वेल्यान मारपेटीची घडणूक बामणवाडो कांदोळे घडली. ह्या प्रकरणांत कळंगूट पुलिसांनी एकामेकां आड गुन्यांव नोंद केला, आनी जखमी सुरक्षा रक्षकाचेर गोमॅकाँत उपचार सुरू आसा. जाल्यार पर्यटक तरणाट्याक डिस्चार्ज दिला.
ही घडणूक बिरेस्तारा 6 वेर रातच्या 10 वरांच्या सुमाराक घडली. कल्याण ठाणें (महाराष्ट्र) हांगाचो स तरणाट्यांचो गट गोंयांत पर्यटना खातीर आयिल्लो. कांदोळे हॉटेल त्रिशूलांत ह्या गटान व्हिला बूक केल्लो. हो फ्लॅटवजा व्हिला आवडूंक नाशिल्ल्यान तांकां हॉटेल धनयान रक्कम परत केली.
उपरांत हो पर्यटक गट हॉटेलाचे भायर वतालो. ह्या वेळार हाटेलाच्या एका कर्मचाऱ्यान सुरक्षा रक्षकाक भायर वचपी एका तरणाट्यान हॉटेलाच्या प्राकारांत मुतिल्ल्याचें सांगलें. ताचे वेल्यान पर्यटक धिरज चौधरी हाका सुरक्षा रक्षकान जाब विचारलो. हाचे वेल्यान वाद जालो.
पयलीं तीन पैकीं एका सुरक्षा रक्षकान धिरजाचेर दांड्यान हल्लो केलो तशेंच ताचेर फातर शेंवटिले. ताका लागून ताणें फातर शेंवटून प्रतिवार केलो. हो प्रकार नदरेक येतकच ताच्या इश्टांनी घडणूक थळार धांव घेतली.
ह्या मारपेटीत धिरज चौधरी आनी सुरक्षा रक्षक गुलजार अली हे दोगूय गंभीर जखमी जाले. जखमींक रोखडेच गोमॅकाँत दाखल केले. थंय सावन सकाळीं धिरज चौधरीक डिस्चार्ज दिलो. जाल्यार अलीचेर उपचार सुरू आसात.
पुलिसांनी जखमी धिराजाचो भाव निरज चौधरी आनी जखमी गुलजार अली हांचे कागाळीच्या आदारान गुलजार अली, मुजबीर हुसेन आनी सुलेमान रेहमान हे सुरक्षा रक्षक आनी पर्यटक धिरज चौधरी हांचे आड एकामेकां आड गुन्यांव दाखल केला. पुलीस निरिक्षक परेश नायक हांच्या मार्गदर्शना खाला उपनिरिक्षक साहील वायंगणकार आनी सहाय्यक उपनिरिक्षक नरेशकुमार साळगांवकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
