भांगरभूंय | प्रतिनिधी
म्हापशें ः कांदोळे देशी पर्यटकाच्या रेन्ट अ कॅब मोटारीन धपको दिल्ल्यान एका जाण्ट्या ब्रिटीश पर्यटकाक मरण आयलें जाल्यार एकली जखमी जाली. हरीष चुनिलाल सोळंकी (86) अशें मरण आयिल्ल्याचे नांव आसा. जाल्यार ताची जखमी घरकान्न चंद्रकांता सोळंकी (81) हिचेर जीएमसींत उपचार चलतात. ह्या प्रकरणांत कळंगुटे पुलिसांनी विकी ओमप्रकाश जैन (48, गाजियाबाद, उत्तर प्रदेश) हाका अटक केल्या.
शुक्रारा सकाळीं सुमार 10.05 वरांचेर कांदोळे फिशरमन कोव रेस्टॉरंट लागसार हो अपघात जालो. दुबावीत विकी जैन हो जीए 03 व्ही 8339 क्रमांकाचे मोटारीन सिकेरी सावन कळंगुटे वतालो. ते वेळार ताचे गाडये वेले नियंत्रण गेले आनी रस्त्या कुशीकच्यान चलपी जाण्ट्या ब्रिटीश पर्यटकांक धपको दिलो. ह्या अपघातांत मयत हरीष आनी ताची बायल चंद्रकांता हें जाण्टे जोडपें गंभीर जखमी जाले. जखमींक रोखडेंच कांदोळे भलायकी केंद्रांत व्हेले. उपरांत फुडल्या उपचारा खातीर जीएमसींत व्हेले. थंय उपचार चलतना सांजवेळार हरीषाक मरण आयलें. जखमी चंद्रकांताचेर उपचार सुरू आसात.
ह्या प्रकरणांत पुलिसांनी मोटार ड्रायव्हर दुबावित विकी जैन हाचे आड गुन्यांव नोंद करुन ताका अटक केली. भारतीय दूतावासाच्या मजतीन पुलिसांनी मेल्ल्या मनशाच्या कुटुंबा कडेन संपर्क सादून अपघाताची म्हायती दिली. पुलीस निरिक्षक परेश नायक हांच्या मार्गदर्शना खाला उपनिरिक्षक विघ्नेश नायक फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
