भांगरभूंय | प्रतिनिधी
नवी दिल्ली, खबरां संस्था: फाटल्या वर्सा प्रदर्शीत जाल्लो ‘कांतारा’ चित्रपट बरोच हीट जालो. ऋषभ शेट्टी दिग्दर्शीत ह्या सिनेमांत लोकभावना आनी श्रद्धेचेर भाश्य केल्ल्यान व्हडा प्रमाणांत प्रेक्षक ह्या चित्रपटा कडेन वळ्ळे. सैम देव आनी मनीस हांचे मदलें बंधन ह्या चित्रपटांत चित्रायलां. हाचो परिणाम म्हळ्यार फक्त १६ कोटी रुपयांनी तयार जाल्ल्या ह्या सिनेमाक वट्ट ४५० कोटी रुपया मेळ्ळे. जशी जशी ताची लोकप्रियता वाडत गेली तशी तशी ह्या गिरेस्त कथानक आनी काळजाक स्पर्श करून वचपी अभिनया खातीर जायते पुरस्कार मेळ्ळे. आतां ‘कांतारा २’ चें शुटींग २७ नोव्हेंबर २३ सावन सुरू जालां.
‘कांतारा २’ हें प्रत्यक्षांत कांताराचें प्रीक्वेल, म्हणल्यार ‘कांतारा’ पयलीं कितें घडलें हाचो सोद आमी ह्या चित्रपटा वरवीं घेतले. म्हळ्यार गुलिगादेव आनी पंजूर्लीदेव हांची व्युत्पत्ती, भुतकाळांतली ही प्रथा कशी सुरू जाली तें आमकां पळोवंक मेळटलें. २७ नोव्हेंबराक मुहूर्त पूजा वांगडा फिल्म मेकींगाची सुरवात करतले. अभिनेतो-दिग्दर्शक ऋषभ शेट्टी, निर्मातो विजय किरगांडूर आनी हेर कलाकार आनी प्रोडक्शन क्रू हाजीर आसतलें. मुहूर्तम पुजे उपरांत डिसेंबरांत निर्माते फिल्माची मुखेल फोटोग्राफी सुरू करतले आनी उरिल्ल्या कलाकारांचीय योग्य वेळार घोशणा जातली.
कंटेंट रिच फिल्मां तयार करपा खातीर नामना मेळयल्ल्या होम्बाळेे फिल्म्स कंपनीन ही अधिकृत घोशणा केल्या. होम्बाळेे फिल्म्स कंपनीन आतां मेरेन ‘केजीएफ-१’ आनी ‘केजीएफ-२’ सारकिल्लीं सुपरहीट चित्रपटां दिल्यांत. तशेंच तांणी रथनाम प्रपंच, राघवेंद्र स्टोरीज आणि कांतारा सारकिले चित्रपटय दिल्यात. २२ डिसेंबर दिसा होम्बाळे फिल्म्स दाक्षिणात्य चित्रपट सृश्टींत ’डार्लींग’ प्रभास अभिनीत ’सालार- युद्धविराम भाग १ ’ घेवन येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
