भांगरभूंय | प्रतिनिधी
भांगरभूंय । प्रतिनिधी
मडगांवः वेंचणुकेक सामकार वचपा खातीर पक्ष संघटना बळीश्ट करपाची गरज आसा अशें आमी सांगून जालें. पक्ष संघटना बळिश्ट आसले बगर लोकां सामकार किदें म्हणून वतले. काँग्रेस फुडारी पक्षांतरां करतात असो लोकांचो आरोप आसा. तातूंतल्या भायर पडपा खातीर संघटना जे चलयतात तांणी काम करपाची गरज आसा अशें काँग्रेस फुडारी एल्विस गोम्स हांणी सांगलां.
दक्षीण गोंयांतल्यान काँग्रेस पक्षा वतीन लोकसभा वेंचणूक लडोवपाक आपूण इत्सूक आसा हें हावें पयलींच स्पश्ट केलां अशें तांणे सांगलें. मात उमेदवारी कोणाक दिवप व्हो निर्णय पक्षश्रेश्ठी घेतले. पक्षा कडेन एका परस चड उमेदवार आसप हें केन्नाय बरें. आपूण पक्षाचें काम करीत रावतलों आनी लोकसभा वेंचणुके खातीर पक्ष जो उमेदवार दितलो ताचे खातीर आपूण काम करतोलों अशें ताणे सांगलें.
पेडणे तें काणकोण मेरेनच्या पक्षाच्या वावुरप्यांक एकठांय हाडपाचें काम आमचे पक्ष फुडारी कशे तरेन करतात ताचेर बरेंच निंबून आसा. काँग्रेस सामकार भाजपा व्होच एक प्रतिस्पर्धी आसा. येता ते लोकसभा वेंचणुकेंत भाजपाक येश मेळप कुस्तार अशें म्हाका दिसता. काँग्रेस दोनूय सुवातो जिखतलो अशें फकत म्हणून उपकरना. ते खातीर संघटितपणान यत्न करपाची सामकी गरज आसा अशें ताणे सांगलें.
भाजपान लोकसभा वेंचणुकेची तयारी सुरू केल्या. काँग्रेस पक्षाची तशी तयारी सध्या तरी दिसना. दीस थोडे आसात. पक्षाच्या फुडाऱ्यांनी काँग्रेस व्हो पक्षांतर करतल्यांचो पक्ष असो जो समज हालिसाराक पातळ्ळा तो पयस करपा खातीर यत्न करपाची गरज आसा अशेय गोम्स हाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
