भांगरभूंय | प्रतिनिधी
माणीकराव ठाकरे: अध्यक्ष वेंचून काडपाक केंद्रीय निरिक्षक येतले गोंयांत
पणजी: गोंय काँग्रेस पक्षाचे विकेंद्रीकरण करपा खातीर पक्षा वतीन चार जिल्हो संघटणा तयार केल्यात. तांचे अध्यक्ष वेंचून काडपा खातीर केंद्रीय निरिक्षक 17 फेब्रुवारी ते 1 मार्च मजगतीं गोंयांत येतले. हाचे उपरांत चारूय जिल्ह्यां खातीर अध्यक्ष वेंचून काडटले अशी म्हायती प्रभारी माणीकराव ठाकरे हांणी दिली.
शुक्रारा पणजेंत घेतिल्ले पत्रकार परिशदेंत ते उलयताले. ह्या वेळार प्रदेशाध्यक्ष अमीत पाटकार, विरोधी पक्ष फुडारी युरी आलेमांव आनी हेर पदाधिकारी हाजीर आशिल्ले.
ठाकरे हांणी सांगलें, केंद्रीय काँग्रेस समितीन संघटन सृजन अभियान सुरू केलां. गोंया सयत वेंचणुको जावपी हेर चार राज्यांनी हें अभियान जातलें. तेप्रमाण केंद्रीय निरिक्षक गोंयांत येवन थंयचे कार्यकर्ते, पदाधिकारी बरें मागप्यां कडेन भेटी घेतले.
केंद्रीय निरिक्षक दरेक मतदारसंघांत, बुथाचेर वतले. निरिक्षक सात दीस संघटण जिल्ह्यांतूच राबितो करतले. ह्या वेळार जिल्हो अध्यक्षपदा खातीर इत्सूक आशिल्ल्यांच्यो मुलाखती लेगीत जातल्यो.
ठाकरे हांणी म्हणलें, निरिक्षक तीन पात्र उमेदवारांची नांवां केंद्रीय समितीक कळयतले. उपरांत जिल्हो अध्यक्षांची नेमणूक करतले. हे प्रक्रियेक लागून प्रदेश काँग्रेसीच्या अधिकारांचें विकेंद्रीकरण जातलें. निरिक्षकांक आपल्या राबित्या वेळार दीसभराचो अहवाल केंद्रीय समितीक धाडचो पडटलो. अभियाना वरवीं पक्ष संघटणा घटमूट करपा खातीर तळागाळांत पावोवपाचो उद्देश साध्य जातलो. केंद्रीय निरिक्षकां सयत थळाव्या पांवड्या वेले तीन निरिक्षक लेगीत आसतले.
अमीत पाटकार हांणी सांगलें पक्ष संघटणे खातीर म्हादय, उत्तर गोंय, दक्षीण गोंय, कुशावती अशे जिल्हे केल्यात. उत्तर गोंयांत शोभा ओझा, दक्षीणेंत एन रघुवीर रेड्डी, कुशावती खातीर विजय सिंगला जाल्यार म्हादय खातीर आर सी कुतीया निरिक्षक म्हूण काम पळयतले. तशेंच आमदार कार्लोस फेरेरा, आमदार एल्टन डिकॉस्टा, खासदार विरियातो फर्नांडीस आनी आदले खासदार फ्रान्सीस सार्दीन हे थळावे निरिक्षक म्हूण काम पळयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
