भांगरभूंय | प्रतिनिधी
केंद्रीय फुडारी निमाणो निर्णय घेतले : प्रदेश अध्यक्ष पाटकार
पणजी : आमदारां मदले मतभेद आनी दिगंबर, मायकला आड अपात्रतायेची याचिका प्रलंबीत आशिल्ल्यान काँग्रेस विधीमंडळ फुडारीपदाचो तिढो कायम आसा. केंद्रीय फुडारी निमाणो निर्णय घेतले. ह्या सप्तकांत निर्णय जातलो अशें प्रदेश काँग्रेस अध्यक्ष अमीत पाटकार हांणी सांगलें.
विधीमंडळ फुडारीपदा खातीर संकल्प आमोणकार आनी अॅड. कार्लोस फेरेरा हांच्या नांवाची चर्चा जाली. कोणाच्याच नांवाचेर एकमत जालें ना, हाका लागून अजून मेरेन निर्णय जावंक ना अशी म्हायती गोपांनी दिली. हाका लागून दोन सप्तका उपरांत लेगीत काँग्रेसीचो विधीमंडळ फुडारी थारना. विधीमंडळ फुडारीपदा खातीर आमदारांच्यो बसका जाल्याे. ह्या सप्तकांत परतून बसका जातली. आमदारां कडल्यान नांवां घेवन ती केंद्रीय फुडाऱ्यां मेरेन पावयतले. केंद्रीय फुडाऱ्यांच्या मान्यताये उपरांत निमाणो निर्णय जातलो अशें अमीत पाटकार हांणी सांगलें.
आमदारांक विचारलें तेन्ना अजून निर्णय जावंक ना. केंद्रीय फुडारी निर्णय घेतले अशें आमदार सांगतात. अधिवेशना पयली 10 जुलयाक काँग्रेसीचे आमदार फुट्टात अशी धुसफूस सुरू आशिल्ली. अधिवेशनाचे आदले दीस कांय आमदारांक काँग्रेसीन एका हॉटेलांत दवरिल्ले. कांय आमदारांनी मुख्यमंत्री डॉ. प्रमोद सावंत हांची भेट घेतिल्ली. हाचे उपरांत दोन सप्तक विधानसभेचें पावसाळी अधिवेशन सुरू आशिल्लें.
आमदारा मदीं धुसफूस कायम
अधिवेशनाच्या पयल्याच दिसा विधीमंडळ फुडारीपदा वेल्यान मायकल लोबो हांकां काडचो अशें पत्र आमदारांनी सभापतीक दिलें. सभापती रमेश तवडकार हांणी मात ह्या पत्राचेर अजून कसलीच कारावाय करूंक ना. हाका लागून अधिवेशना वेळार मायकल लोबो हांणीच विरोधी पक्ष फुडारीपदाची जापसालदारकी निभायली. ते भायर दिगंबर कामत तशेंच मायकल लोबो हांचे आड अपात्रतायेची याचिका काँग्रेस पक्षान दाखल केली. हे याचिकेचेर अजून मेरेन निर्णय जावंक ना. काँग्रेसीच्या सगल्या आमदारांनी विधानसभेंत सरकाराचो विरोध केलो. तरी अपात्रतायेची याचिका दाखल जाल्ल्या कारणान दिगंबर कामत तशेंच मायकल लोबो हे निरशेल्यात. कांय आमदार दिगंबरा वटेन जाल्यार कांय आमदारांचो मायकल लोबोक तेंको आशिल्ल्या कारणान धुसफूस वाडल्या. हाका लागून नव्या विधीमंडळ फुडाऱ्याची निवड लांबणेर पडपाची शक्यताय आसा.
अधिवेशन काळांत काँग्रेसीचे केंद्रीय फुडारी मुकूल वासनीक हे गोंयांत येवन गेले. वासनीक हांणी कांय आमदारांची भेट घेवन चर्चा केली. आमी काँग्रेस पक्षा बराबर आसात अशें सगल्या काँग्रेस आमदारांनी तांकां सांगलें. तरी लेगीत विधीमंडळ फुडाऱ्याच्या निवडी खातीर जाल्ले बसकेक दिगंबर कामत आनी मायकल लोबो गैरहाजीर आशिल्ले.
अॅड. कार्लोस फेरेरा आनी संकल्प आमोणकार हांची विधीमंडळ फुडारीपदा खातीर चर्चा आसा. दिगंंबर कामत हे ज्येश्ठ आमदार आसात. विधीमंडळ फुडारीपद दिलें जाल्यार तांंची निरशेवणी जातली. विधीमंडळ फुडारीपदाचो स्विकार करचो अशी परतून तांंकां विनवणी करची असो विचार पक्षांत चलता.
उपसभापतीपदाचे वेंचणुकेंत काँग्रेसीन डिलायला लोबो हांंकां उमेदवारी दिली. काँग्रेसीच्या सगल्या आमदारांची मतांं डिलायला लोबोक मेळ्ळीं. आम आदमी पक्ष आनी रिव्होल्युशनरी गोअन्स हांंणी मात तटस्थ रावप पसंंद केलें. काँग्रेसीचे सगले आमदार एकठांय आसात असो संंदेश हातूंतल्यान निर्माण जालो.
राष्ट्रपतीपदाचे वेंचणुकेंत काँग्रेसीच्या सगल्या आमदारांनी यशवंंत सिन्हा हांंकां मतदान केल्ल्याचो दावो अध्यक्ष अमीत पाटकार हांणी केला. तरी लेगीत विरोधकांंची तीन मतांं रालोआच्या उमेदवाराक मेळ्ळीं. हाका लागून काँग्रेसीच्या आमदारांं मदीं दुबाव कायम आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
