भांगरभूंय | प्रतिनिधी
‘नशामुक्त भारत नमो रन’क राज्यांत बरो प्रतिसाद : 3300 जाणांनी घेतलो वाटो
दिवचल: प्रधानमंत्री नरेंद्र मोदी हांच्या सक्षम नेतृत्वा खाला फाटल्या धा वर्सां भारत गिरेस्तकायेचे, समृद्धीचे तेंगशेर पावलां. मात काँग्रेसीचे लोक भाजपान चलयिल्ल्या कल्याणकारी आनी देशाच्या हिताच्या यत्नांक आडमेळीं हाडपाचो यत्न करतात. तशेंच फट, बोगस आरोप करीत समाजांत वीख पातळायतात. शेजारच्या राष्ट्रांकूय भारताची जावपी उदरगत पळोवं नज जाल्या. अशे परिस्थितींत तरणाट्यांनी वेसन मुक्तीचो ध्यास घेवन पुराय देशांत घुवळे मुक्त भारत निर्माण करपाचो फुडाकार घेवप गरजेचें अशें भाजप प्रदेशाध्यक्ष दामू नायक हांणी सांगलें. ते दिवचले भारतीय जनता पार्टी युवा मोर्चा वतीन व्हाळशी- दिवचले ‘नशा मुक्त भारत’ खाला ‘नमो रन’चें विवीध गटांत आयोजन केल्लें. ह्या वेळार ते उलयताले.
ह्या वेळार 3300 तरणाट्यांनी, तशेंच ज्येश्ठ नागरिकांनी, बायलां, भुरग्यांनीय वाटो घेतलो.
तरणाट्यांनी देशाच्या फुडारा खातीर आपलें योगदान दिवपाची गरज आसा. ह्याच हेतान प्रधानमंत्री नरेंद्र मोदी हांच्या वाढदिवसाच्या निमतान ‘नशा मुक्त भारत’ वरवीं सगल्या तरणाट्यांक एकठांय करपा खातीर ‘नमो रन’चें आयोजन हो मुखेल हेत आशिल्ल्याचें दामू नायक हांणी स्पश्ट केलें.
ह्या वेळार माचयेर राज्यसभा खासदार सदानंद तानावडे, आदले खासदार नरेंद्र सावयकार, दिवचलचे आमदार डॉ. चंद्रकांत शेट्ये, मयेंचे आमदार प्रेमेंद्र शेट, उत्तर गोंय भाजप अध्यक्ष दयानंद कार्बोटकार, युवा अध्यक्ष तुषार केळकार, भाजपाचे फुडारी सिद्धार्थ कुंकळकार, समीर मांद्रेंकार, दीपक नायक, सर्वांनंद भगत, राष्ट्रीय युवा फुडारी अर्पिताजी, अनिकेत चणेकार आनी हेर हाजीर आशिल्ले.
सदानंद तानावडे हांणी सांगलें, मुक्त भारत नमो रन वरवीं देशांतले तरणाटे आनी सगले सामान्य जनतेक नशे पसून मुक्त करतना आदर्श भारत मातेची सेवा करपाची प्रेरणा दिवपाचो उद्देश आसा. हाका व्हड प्रतिसाद मेळिल्ले खातीर भाजप युवा तशेंच आमदार शेट्ये आनी प्रेमेंद्र शेट हांकां परबीं भेटयलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
