भांगरभूंय | प्रतिनिधी
फक्त कांय वरांचीच प्रतिक्षा. नवें 2025 वर्स दारार मारपाक लागलां. पोरणें 2024 वर्स काळाच्या पोटांत गडप जावपाचें आसून पुराय संवसार नव्या वर्साच्या येवकाराक सज्ज रावला. अस्तंते कडल्या वर्सान आमकां कितें दिलें वा कितें झोमून घेतलें हाचो जमाखर्च दरेकलो आपापले परीन करतलेच. अर्थकारण, राजकारण, उद्देग अशा साबार मळांचेर ह्या वर्सान नेमकें कितें दिलें, हाचो हिशेब कांय जाण मांडटले. खेळा मळूय हाका आडवाद ना. 2024 वर्सान ते तुळेन राजकी मळाचेरुय एखाद्या पक्षाक भरभरून दिलां, अशें म्हणपाक मेळचें ना. हातचें राखून दरेका राजकी पक्षाचे झोळयेंत कितें ना कितें उडोवपी हें वर्स आतां इतिहासजमा जावपाचें आसलें तरी नव्या वर्सांत राजकी आघाडेचेर नेमके कितें जावपाक शकता हाचे संकेत मात तें दिवन वता अशें म्हणचें पडटलें. अस्तंतपी वर्सांत आपल्या इश्ट पक्षांच्या पालवान आपलें अस्तित्व तिगोवन दवरपांत, खास करून भारतीय जनता पक्षाचे तोडीस तोड अशी कामगिरी करपा इतले मेरेन लोकांच्यो अपेक्षा वाडोवपांत कांय प्रमाणांत यशस्वी थारिल्ल्या काँग्रेसीन वर्स सोंपता सोंपता आपली अवस्था अशी करून घेतल्या की नव्या वर्सांत हो पक्ष एकाकी तर पडचो ना मूं, अशे दरेकल्याक दिसपाक लागलां. व्हडल्या यत्ना उपरांत इडी आघाडीच्या रुपान एकठांय येवन केंद्रांतल्या भाजपाक शह दिवपांत येसस्वी थारिल्ल्या विरोधकांनी आतां काँग्रेस पक्षाकूच हे आघाडेचे भायर दवरपाक हालचाली सुरू केल्ल्याचें वर्स अखेरेक स्पश्ट दिसपाक लागलां.
म्हयन्या देड म्हयन्यांतूच दिल्लीच्या तख्ता खातीर राजकी लढाय जातली, पूण विरोधकांची आपल्या आदल्या चुकां पसून कसलोच बोध घेवपाची कसलीच तयारी दिसना. तातूंत आतां नव्या समस्यांक तोंड दिवपाचो वेळ विरोधकांचेर आयला. दिल्लींत जावपी विधानसभा वेंचणुकेंत काँग्रेस आनी इंडी आघाडेंतल्या इश्ट पक्षांतलें देंगण इतलें रुंद जायत चल्लां की ताचें पर्यावसान एक तर आघाडीचें अस्तित्वूच सोंपोवपाक शकता वा काँग्रेस पक्षाक आघाडेंतल्यान भायर धांवडावपांत जावं शकता. राहुल गांधींक प्रधानमंत्री पदाचेर बसोवपाचो एक कलमी कार्यक्रम घेवन काँग्रेसीचो फाटलीं पांच- स वर्सां प्रवास चालू आसलो तरी राहुलाच्या फुडारपणा खाला कांयच साध्य जावपाक शकना, हें आतां इडींतल्या एखादो पक्ष सोडल्यार भोवतेक घटक पक्षांक कळून चुकलां. काँग्रेसीक साथ दिवप आनी राहुल गांधींचें बालिश फुडारपण स्विकारप ह्यो दोन वेगळ्यो गजाली आसून त्यो वांगडाच स्विकारप म्हणल्यार आपल्याच पांयांचेर फांतर मारून घेवपा सारकें आसा, हाची जाणीव इडींतल्या घटक पक्षांक जाल्या. देखून दिल्ली, बिहारांतल्या विधानसभा वेंचणुकांनी काँग्रेस एकाकी पडपाक शकता, अशी परिस्थिती सध्या निर्माण जाल्या. गौतम अदानी, संविधान, आंबेडकर आनी आतां मनमोहन सिंग ह्या मुद्द्यां वयल्यान राहुल गांधी आपली तथाकथीत आक्रमकपणा दाखयत आसले तरी ह्या मुद्द्यांचो नाका तितलो गाजोवाजो करून भाजपाक शह दिवन कांयच साध्य जावचेंना, हाचेर तृणमुलाच्या ममता दिदीं सयत सगल्यांचेच एकमत जालां.
दिल्लींत सध्या काँग्रेस आनी आम आदमी पक्षांत नेटाचें शाब्दीक झूज चल्लां ताचे वयल्यान हे दोनूय पक्ष फुडाराक एकठांय संवसार करतले, अशी पिशी आस्त इंडीच्या कडवे समर्थकांक पसून बाळगुपाक मेळची ना. अरविंद केजरीवाल हांकां देशद्रोही, लुटारु अशी सगलीं विशेशणां लावन काँग्रेसीचे अजय माकन आनी हेर फुडारी प्रचारांत देंविल्ले दिसतात, तर आम आदमी कडल्यान काँग्रेसीक आतां इडींतल्यान भायलो रस्तो दाखोवपाची जी भाशा वापरप सुरू जालां, तें पळयल्यार दिल्ली विधानसभे खातीर मतदान जाय मेरेन इडीचे कुडके जावपाची चड शक्यताय आसा. उपरांत जावपी बिहार विधानसभा वेंचणुकेंतूय ही आघाडी स्वताक सावरपाक शकतली अशी आस्त बाळगुपाचेंय कारण ना. लालू यादव हांणी आघाडे खातीर ममता बॅनर्जी हांचें फुडारपण स्विकारपाक अनुकूलताय दाखयिल्ल्यान बिहारुय दिल्लीच्याच मार्गान वचपाक शकतलो. अदानी प्रकरणांत राहुल गांधी आनी तांच्या काँग्रेस पक्षान संसदेंत केल्लो अतिरेक हेच आघाडींत फाटाफूट जावपाचें कारण आसा, हाची खरें म्हणल्यार काँग्रेसीक कल्पना येवपाक जाय आशिल्ली. ममता बॅनर्जीन हीच संद सादून आघाडीचें फुडारपण करपाची इत्सा प्रदर्शित केली. राहुल गांधींचें नाणें आतां वाजपा पलतडचें आसा, हाची खात्री आघाडींतल्यान दरेक पक्षाक जाल्ल्यानूच तांकां आनीक संद दिवपाच्या विरोधांत सगलेच दंड थोपटून उबे आसात. अर्थांत अशें जावपांत केंद्रांतल्या भाजपाची अजिबात भूमिका ना, अशें कोणाक दिसता जाल्यार तें चुकीचें. काँग्रेसी एकाकी उडोवप हेंच तर भाजपाचें निर्धारीत लक्ष्य आसा. तें सहज साध्य जावपाक लागिल्ल्यान ताची तांकां खोस जावप सभावीकूच आसा.
काँग्रेस लोकसभेंत भाजपा उपरांतचो सगल्यांत व्हडलो पक्ष जरुर जाला, पूण स्वताच्या बळग्यार तांकां हो जागो मेळूंक ना, हें मान्य करचेंच पडटलें. इंडी आघाडेंतल्या वांगडी पक्षांचें हातूंत व्हडलें योगदान आसा. तातूंय समाजवादी सारक्या पक्षाचोय वांटो आसा. म्हणूनच काँग्रस लोकसभेंत 100 च्या लागीं पावपाक शकली. काँग्रेसीक खरें पळयल्यार आतां स्वताच्या बळग्याचेर मैदानांत देंवप परवडपाचें ना, हें स्पश्ट जाल्लें आसतनाय तांणी प्रादेशीक पक्षां कडेन संघर्शाची भूमिका स्विकारली तर तांचे खातीर तें मारक थारूं शकतलें. राहुलाचें तुणतुणें आतां जायत्या राज्यांतले प्रादेशीक पक्षूय स्विकारपाक तयार नात, हें वास्तव स्विकारून काँग्रेसीक मुखार वच्चें पडटलें, पूण राहुल तांकां प्रधानमंत्र्यांच्या कदेलाचेर बशिल्ले पळोवंक जाय. आतां हें सगलें साध्य करपाचें आसल्यार क्षुल्लक गजालीं वयल्यान राहुल गांधी हांचें नौटंकीचें जें राजकारण चल्लां तें सगल्यांत पयलीं काँग्रेसीक थांबोवचें पडटलें. संविधान बचाव, ईव्हीएम हाचे वयल्यान चालू आशिल्लें तांचें नौटंकीचें राजकारण ना कळपा इतले ह्या देशांतले लोक निश्चितूच पिशे नात, हाची जाण तांकां जितले बेगीन येता, तितलेंच काँग्रेसीक हिताचें थारतलें. काँग्रेसीक आपले मूळ विचारधारेच्या आदारानूच भाजपा कडेन लढो दिवचो पडटलो तेन्नाच लोक तांच्या फाटल्यान रावतले, हाची आस्त तांकां बाळगू येता. इंडीतले हेर घटक पक्ष आपलें स्वताचें घोडें मुखार धांवडायत राजकारण करपाक लागले जाल्यार लोकसभेंत काँग्रेस तळाक पावपाचो धोको आसा. भाजपाक तर काँग्रेस बळिश्ट जाल्ली उपकारचीना, देखून ते तांच्यो खेळी खेळत आसात…. आनी तांकां तातूंत बरे पैकी येशूय मेळ्ळां. काँग्रेस स्वताच ताका जापसालदार आशिल्ल्यान तांकां आतां एकाकी प्रवास करचो पडलोच तर तांचे खातीर तें खूबच संघर्शाचें थारतलें.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
