भांगरभूंय | प्रतिनिधी
माणिकराव ठाकरे : गोवा फॉरवर्डा कडेन चर्चा
काँग्रेसीचो सुदारीत प्रस्ताव आरजीक अमान्य
भांगरभूंय । प्रतिनिधी
पणजी : सुवातो वांटपाचेर एकमत जावंक नाशिल्ल्यान येता ते जिल्हो पंचायत वेंचणुके खातीर काँग्रेस आनी रिव्होल्युशनरी गोवन्स (आरजी) हांचे मदीं आतां युती जावची ना, हें स्पश्ट जालां. युती जावप आतां अशक्य आशिल्ल्याचें गोंय काँग्रेसीचे प्रभारी माणिकराव ठाकरे हांणी सांगलें. गोवा फॉरवर्ड पक्षा कडेन युती जावपाची शक्यताय आसा. ते दिशेन चर्चा चालू आशिल्ल्याचें तांणी स्पश्ट केलें.
जिल्हो पंचायत वेंचणूक 20 डिसेंबराक जातली. आचार संहिता लागू जावन उमेदवारी अर्ज भरपाक सुरवात जाले उपरांत लेगीत काँग्रेस आनी आरजी हांचे मदीं युती विशीं चर्चा खूब दीस चर्चा चलताली. शेनवारा काँग्रेस प्रभारी माणिकराव ठाकरे हांचे हाजिरेंत काँग्रेस, गोवा फॉरवर्ड आनी आरजीच्या फुडाऱ्यां मदीं युतीचेर चर्चा जाल्ली.
काँग्रेसीन आरजीक जो प्रस्ताव दिल्लो, तो आरजीन मान्य करूंक ना. सुदारीक प्रस्ताव लेगीत आरजीन न्हयकारिल्ल्यान युती तुटिल्ल्याची म्हायती काँग्रेसीचे उपाध्यक्ष एन. के. शेख हांणी दिली. हे विशीं स्पश्टीकरण दितना माणिकराव ठाकरे हांणी सांगलें, सांताक्रूझ मतदारसंघांत काँग्रेसीचो सध्याचो जिल्हो पंचायत वांगडी आसा, ती सुवात सोडपाक आरजी तयार नाशिल्लो. तशेंच, काँग्रेस घटमूट आशिल्ल्या सुवातांचेर लेलगीत आरजीन दावो केलो. ते खातीर युता जावपाक शकली ना.
युती तुटले उपरांत गोवा फॉरवर्डाचे अध्यक्ष विजय सरदेसाय हांणी भाजपाचेर टिका केली. गोंयांत विरोधकांच्या एकवटाक खावटें घालपाचो भाजपाचो प्रयोग येसस्वी जालो. गोंयकार सुसंस्कृत आनी हुशार आसात. वेंचणुके मेरेन कोणे हो प्रकार केलो आनी कोणाक मत दिवचे हाचेर लोक निर्णय घेतले आनी योग्य न्याय दितले. युती मोडपा फाटले घडामोडींचो लोकांनीच विचार करचो. गोवा फॉरवर्डाचे जिल्हो पंचायतीचे उमेदवार कृष्णा परब हांणी उमेदवारी अर्ज दाखल केलो, त्या वेळार सरदेसाय उलयताले.
हे आघाडेंत काँग्रेस हो वरिश्ठ घटक आसा. ताका लागून आघाडेची घोशणा आपणे न्हय जाल्यार काँग्रेसीन करपाक जाय. आपूण विरोधकां मदीं वरिश्ठ आमदार आसूं येता, एक बरी मागणी करपी लेगीत आसूं येता, पूण आपूण आघाडेचो वरिश्ठ घटक ना, अशें सरदेसाय हांणी सांगलें. काँग्रेसींतल्यान भाजपांत गेल्ल्या पक्ष फुटिरांक गोवा फॉरवर्ड पक्षा वतीन फाटल्या दारांतल्यान प्रवेश दितात, ह्या आरजीपीच्या आरोपाक जाप दितना सरदेसाय हांणी सांगलें, प्रादेशीक पक्षाची भुमिका पक्ष फुटिरांक माची दिवची न्हय, ह्या आरजीच्या मताचें आपूण समर्थन करता. पूण पक्ष फुटिरांची व्याख्या कितें, हाचेर खोलायेन विचार जावपाक जाय. आमी खंयच्याच फुटिराक माची दिनात. ताका लागून पक्ष फुटिरांची व्याख्या सारकी थारायात, असो सल्लो सरदेसाय हांणी दिलो.
एकवट फोडपाक भाजप येसस्वी : सरदेसाय
गोंयकारांक जो एकवट जाय, तो घडोवन हाडचे खातीर आनी लोकांक दाखोवचे खातीर आपुणूच आरजीपीक वांगडा हाडपा खातीर फुडाकार घेतिल्लो. भाजप हो व्हड पक्ष आशिल्ल्यान तांचे कडेन व्हड संसाधनां आसात. ते भावाभावां मदीं, घराघरांत फूट घालपाक शकतात. ताका लागून गोंयांत विरोधकांचो एकवट फोडपाचो प्रयोग भाजपान येसस्वी केला, आतां लोकांनी न्याय करचो, अशें विजय सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
