काँग्रेस – आरजीपी युती सोंपिल्यांत जमा

भांगरभूंय | प्रतिनिधी

दोनूय पक्षांचे एकामेका आड उमेदवार उबे

अमीत पाटकार म्हणटा अजून चर्चा चालू आसा

समन्वय तुटिल्ल्याचे मनोज परब हांचें म्हणणें

भांगरभूंय । प्रतिनिधी

पणजी : ग्रॅण्ड ओपोजिशन आघाडी (गोवा) हाची युती लागीं लागीं सोंपत आयल्या. काँग्रेस आनी रेव्ह्युलेशनरी गोवन्स पक्षान सात मतदारसंघांत एकामेका आड उमेदवार उबे केल्यात. पूण काँग्रेसीचे गोंय प्रदेशाध्यक्ष अमीत पाटकार म्हणटा युती विशींची चर्चा चालू आसा. जाल्यार आरजीपीचे अध्यक्ष मनोज परब म्हणटा, काँग्रेसी कडल्यान समन्वय तुटला आनी कसलेंच उलोवप जायना.

काँग्रेसीन आतां मेरेन दोन वळेरी जारी करून 11 उमेदवार जाहीर केल्यात जाल्यार आरजीपीन लेगीत दोन वळेऱ्यो जारी करून 26 उमेदवार जाहीर केल्यात. कळंगूट, सुकूर, रेईश- मागूश, चिंबल, उसगांव- गांजे, सांताक्रुझ आनी कुठ्ठाळी ह्या सात मतदारसंघांत सध्या काँग्रेस आनी आरजीपीचे उमेदवार एकामेका आड उबे आसात.

हे विशीं उलयतना काँग्रेस प्रदेशाध्यक्ष अमीत पाटकर हांणी सांगलें, युती जावची हे खातीर आमी फावो ते यत्न करतले आनी काँग्रेस युती विशींचे भुमिकेचेर ठाम आसा. पुण ज्या मतदारसंघांत काँग्रेसीचे सत्ताधारी झॅडपी आसात ते मतदारसंघ मुलभूत तत्वाच्या आदाराचेर स्वता कडेन दवरप हो आमचो हक्क. जेन्ना 2027 विधानसभा वेंचणुकेंत एकठांय येवन भाजपाक हरोवपाचो प्रस्न येतलो तेन्ना आमचे सत्ताधारी आमदार आशिल्ले कुंकळ्ळी, हळदोणें आनी केपें मतदारसंघ मागले जाल्यार आमी हे तांकां सोडपाचे काय कितें, असो प्रस्न पाटकार हांणी केलो.

आमी एकठांय येवन सुवातो वांटपाचेर चर्चा केल्या. तांणी आपल्याक जाय त्यो सुवातो सांगल्यात, पूण अजून मेरेन कसलो निर्णय जावंक ना. देखून युतीक लागून ज्या मतदारसंघांचेर वाद आनी चर्चा चालू आसा ते 23 मतदारसंघ कुशीक दवरून आमी 22 मतदारसंघांत उमेदवारांची वळेरी जारी केल्या. आयज गोंय काँग्रेसीचे प्रभारी माणीकराव ठाकरे गोंयांत येतले आनी युती विशींचो निमणो निर्णय जातलो, अशी म्हायती पाटकार हांणी दिली.

आरजीपीक आमी आठ दीस पयली युती विशींचो प्रस्ताव दिल्लो. पूण अजूनय परतो प्रस्ताव आरजीपी कडल्यान काँग्रेसी कडेन येवंक ना. सांतांक्रुझ मतदारसंघ आरजीपीक दिवपा विशींची आपले कडेन कसलीच चर्चा जावंक ना. सगल्या मतदारसंघांत आमी घटमूट आसात. तरी लेगीत युती घडोवन हाडपाक आमी बांदील आसात, अशे पाटकार हांणी सांगलें.

जाल्यार सध्यातरी काँग्रेसीचो आमचे कडेन अजून मेरेन कसलेच समन्वय ना आनी युती विशीं कांयच उलोवप जावंक ना, असो दावो आरजीपीचे अध्यक्ष मनोज परब हांणी केला.

आमकां आठ दीस पयलीं प्रस्ताव धाडला, अशें म्हणपी पाटकार हांचे कडल्यान कसलोच प्रस्ताव आमका येवंक ना. जर आयत्या वेळार काँग्रेस आमचे कडेन नवो प्रस्ताव मागता जाल्यार हो बालीशपणा आसा. युती विशींची फुडली भुमिका आमी फाल्या सांजे जाहीर करतले, अशी म्हायती परब हांणी दिली.

जे काँग्रेसींतल्यान फुटून भाजपांत गेल्ले फुटीर आमदार आसात तांकां परत घेवचे न्हय अशी ठाम भुमिका आरजीपीची आसा. पूण काँग्रेसीचोच युती घटक गोवा फॉरर्वड काँग्रेसीच्या फुटीर आमदाराक परत घेता आनी काँग्रेस ताचेर कांयच भाश्य करिना. हाचो अर्थ काँग्रेस फुटीर आमदारा विशीं फक्त उलयता, पूण कारवाय मात कसलीच करिना, असोय आरोप परब हांणी केलो.

काँग्रेसीन फाल्यां फाल्यां करीत युती विशींच्या निर्णयाक कळाव केला. वेळ उणो आशिल्ल्यान आमी दोन पावलां फाटीं पावल्यात. देखून आनीक वेळ वगडाय नासतना आमी 26 मतदारसंघांनी उमेदवार जाहीर करून उमेदवारी अर्ज भरल्यात. युती विशींची फुडली म्हायती पत्रकार परिशदे वरवीं आयज मेरेन कळयतले.

 – विरेश बोरकार, आमदार, सांत आंन्द्रे