भांगरभूंय | प्रतिनिधी
म्हापश्यां डॉ. भीमराव आंबेडकर सन्मान अभियान पुस्तिकेचें विमोचन
म्हापशें: डॉ. भीमराव आंबेडकर हांचो काँग्रेसीन पावला कणकणीं अपमान केला. डॉ. आंबेडकर हांकां संविधान सभांनी येवपा पसून आडायलो, ह्या सभांनी आंबेडकर हांच्या विचारांच्या विरोधांत मत नोंदणी केली. 1952 वर्साचे मुंबय मध्य लोकसभा वेंचणुकेंत आनी भंडाराच्या 1954 चे पोटवेंचणुकेंत आंबेडकार हांकां हारोवपाचे पाप पं. जवाहरलाल नेहरू आनी तांच्या काँग्रेसीन केलां. महापरिनिर्वाण जाले उपरांत आंबेडकार हांच्या निमाण्या संस्कारा खातीर दिल्लींत एक चौ.मि. सुवात दिवपाची दानत लेगीत काँग्रेसीन दाखयली ना. उरफाटें तांची कूड दिल्ली सावन मुंबयंत हाडटना त्या विमानाचें भाडें लेगीत मागपाचें पाप ह्या काँग्रेस पक्षान केलां. अशा काँग्रेसीन आंबेडकारांचो पुळको घेवन भाजपाचेर भ्रमण निर्माण करपाचो जो आरोप केला तो चुकीचो आसून हाचेर उजवाड घालपा खातीर हें डॉ. भीमराव आंबेडकर सन्मान अभियान आसा अशी म्हायती महाराष्ट्राचे आदले राज्यसभा खासदार अमर साबळे हांणी दिली.
म्हापश्यां भाजपाच्या जिल्हो कचेरेंत डॉ. भीमराव आंबेडकर सन्मान अभियाना खाला आयोजीत जिल्हो पांवड्या वेले कार्यावळींत अभियानाच्या पुस्तिकेचें विमोचन केले उपरांत साबळे पत्रकारां कडेन उलयताले.
ह्या वेळार तांचे सयत प्रदेशाध्यक्ष दामू नायक, उपसभापती ज्योशुआ डिसोझा, आमदार प्रवीण आर्लेंकार, आदले खासदार नरेंद्र सावयकार, सिध्दार्थ कुंकळयेंकार आनी हेर पदाधिकारी हाजीर आशिल्ले.
मुखार उलयतना साबळे हांणी सांगलें, भाजपान राष्ट्रीय पांवड्यार डॉ. भीमराव आंबेडकर सन्मान अभियान सुरू केलां. फाटल्या 2024 वर्साचे वेंचणुकेंत भाजपा कडल्यान संविधान बदलतले असो अपप्रचार काँग्रेसीन करून लोकांच्या मनांत दुबाव निर्माण करून आपली राजकी पोळी भाजपाचो यत्न केलो. पूण वस्तूस्थिती कितें आसा हें समाजा मेरेन वचून सांगूंक जाय. हाचे खातीर हें अभियान आसा.
डॉ. आंबेडकर हांणी बरयिल्ल्या संविधानांत काँग्रेसीन 75 फावटी बदल करून स्वताची राजकी पोळी, सुवार्थ आनी स्वताचो परिवार घटमूट करपा खातीर तांणी ही दुरुस्ती केल्ली. भाजपा कडल्यान ज्यो दुरुस्ती जाल्यात त्यो समाजीक आनी देश हिता खातीर जाल्यात. 1975 वर्सा संविधानाची मोडतोड करून आणिबाणी लायली आनी व्यक्ती स्वातंत्र्याक घात निर्माण केलो. अशा काँग्रेसीन भाजपा संविधान बदलतली असो अपप्रचार करप म्हणल्यार ‘चोराच्यो उरफाट्यो बोबो’ असो आरोप साबळे हांंणी केलो.
डॉ. भीमराव आंबेडकर हांणी संविधान बरयलें म्हणूनच देशाचो राज्यकारभार हो मनू वृत्तीच्या आदाराचेर न्हय जाल्यार हिमसुत्रांच्या अर्थांत संविधानाच्या माध्यमांतल्यान चल्ला अशे प्रधानमंत्री नरेंद्र मोदी हांणी स्पश्ट केलां. देशाचे राष्ट्रस्त्रोत्र हें डॉ. आंबेडकर हांणी बरयिल्लें संविधान आसा. आंबेडकर हांचो पदस्पर्श जाल्लीं जीं पांच थळां आसात. तीं पंच तीर्थ म्हूण विकसीत करपाचें काम तशेंच संविधानाचो सन्मान करपाचें काम लेगीत नरेंद्र मोदी आनी भाजपान केला. ताका लागून काँग्रेसीच्या अपप्रचाराक बळी पडूं नाकात, तांचे पोलखोल ह्या अभियानांतल्यान पिंजून उडयात अशें प्रशिक्षण कार्यकर्त्यांक दिलां. तशेंच अनुसुचीत जाती जमाती आनी ओबीसी हांच्या घरा वचून वस्तूस्थिती मांडपाचें हें अभियान आसा. तशेंच 2047 वर्सा विकसीत भारताचें सपन साकार करपाचे दिशेन पावल घालपी 2029 चे लोकसभा वेंचणुकेची ही पूर्व तयारी आशिल्ल्याचें साबळे हांणी सांगलें.
प्रदेशाध्यक्ष दामू नायक हांणी सांगलें, 13 ते 25 एप्रील मजगतीं डॉ. भीमराव आंबेडकर सन्मान अभियान गोंया सयत देशभरांत सुरू आसा. संविधाना विशीं विरोधकांनी राबियल्ल्या अपप्राचाराचो फटको भाजपाक फाटले वेंचणुकेंत बसला. तशेंच समाजांत गोंदळ निर्माण जाला. हे विशीं लोकां मदीं आमी जनजागृती करपाचें काम अभियाना खाला करीत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
