भांगरभूंय | प्रतिनिधी
पणजीः काँग्रेस पक्षाची संघटना घटमूट करपा खातीर देशभरांत संगठन सृजन अभियान सुरू केला. हाचो एक भाग म्हूण गोंयांतल्या काँग्रेस प्रशासनाच्या म्हादई जिल्होध्यक्षा खातीर तीग जाणांची निवड केल्या. हातूंत मंगलदास नायक, प्रणव परब आनी सुबोध आमोणकार हांचो आस्पाव आसा. फुडल्या पंदरा दिसांत जिल्होध्यक्षांचीं नांवां जाहीर जातली अशी म्हायती अभियानाचे गोंय निरिक्षक डॉ. रामचंद्र कुंतीया हांणी दिली. शुक्रारा पणजेंत जाल्ले पत्रकार परिशदेंत ते उलयताले.
कुंतीया हांणी सांगलें, जिल्हो अध्यक्षांची निवड करपा खातीर आमी तळागाळांतल्या कार्यकर्त्यांकडेन तशेंच गट आनी हेर पदाधिकाऱ्यां कडेन चर्चा केल्या. वयलीं तीन नांवां केंद्रीय पांवड्यार धाडटले. थळाव्या फुडाऱ्यांच्यो शिफारशी हे निवडींत घेवंक नात. देखून पक्षा खातीर प्रामाणीकपणान वावुरपी कार्यकर्त्यांचेर अन्याय जावचो ना हाची जतनाय घेतात. नेमिल्ल्या अध्यक्षांनी स म्हयन्यां भितर बरें काम करुन दाखवप. अशें जालें ना जाल्यार तांकां पदा वयल्यान काडटले.
तांणी म्हणलें, पक्षान सत्ता विकेंद्रीकरणा खातीर ही मोहीम सुरू केल्या. नव्या जिल्होध्यक्षांक पयलीं परस चड अधिकार दितले. काँग्रेस गट आनी नगरपालिका समित्यांचे वेंचणुकेंत तांचो आस्पाव जातलो. तशेंच गट समित्यांचे अधिकार वाडयतले. लोकशाय आनी धर्मनिरपेक्षतायेचेर विस्वास दवरपी तरणाटे पक्षांत सक्रीय करपा खातीर ही मोहीम सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
