भांगरभूंय | प्रतिनिधी
वाल्मिकी नायक : भाजपा वांगडा युती केल्ल्याचो आरोप
भांगरभूंय । प्रतिनिधी
पणजी : दिल्ली सरकाराचे निश्क्रियतेक लागून आम आदमी पक्ष वेंचणुकेंत हारूंक ना. जाल्यार भाजप आनी काँग्रेस हांणी मेळून आप आड कारस्थान रचून केल्ले वोट चोरीक लागून आप दिल्लींत वेंचणूक हारला. हाची कबुली स्वता दिल्लीच्या काँग्रेस फुडाऱ्यांनी दिल्या, असो आरोप आपचे गोंय उपसंयोजक वाल्मिकी नायक हांणी केला.
आपचे कचरेंत आपयल्ले पत्रकार परिशदेंत वाल्मिकी नायक उलयताले. ह्या वेळार कार्यकारी अध्यक्ष जर्सन गोम्स हजर आसले.
दिल्लींत आपचें सरकार आशिल्लें तेन्ना फक्त आप भाजपा आडच न्हय जाल्यार भाजप आनी काँग्रेसीचे युती आड झुजताले, असो आरोप नायक हांणी केलो.
हो दावो आमी करिनात. हें स्वता दिल्ली काँग्रेस पक्षाचे अध्यक्ष देंवेद्र यादव हांणी एके मुलाखतींत मान्य केलां. आपाक हारोवपा खातीर तांणी कशी स्ट्रेटजी केल्ली हें तांणी मान्य करून काँग्रेस पक्षाचे हायकमांड जाचो भाग राहुल गांधी आनी मल्लिकार्जून खर्गे वांटेकार आशिल्ले. तांणी हे स्ट्रेटजीक मान्यताय दिल्याचें सांगलां, असो दावो नायक हांणी केलो.
काँग्रेस आतां वोट चोरीचो आरोप करता, तशीच वोट चोरी दिल्लींत लेगीत जाल्या. वेंचणुके पयली अरविंद केजरीवाल हांणी वेंचणूक आयोगा कडेन कागाळ करून 12 टक्के मतदारांचो फेरफार मतदार वळेरेंत जाल्याचें सांगिल्लें. पूण त्या वेळार वोट चोरी सारको काय प्रकार ना आनी केजरीवाल हारीक भियेला म्हूण असले आरोप करीत सुटला, हें म्हणपी काँग्रेसीचे व्हड फुडारी आसले. जेन्ना तुमका बादता तेन्ना वोट चोरी आनी दुसऱ्यांक बादता तेन्ना चोरी जायना, असो प्रस्न नायक हांणी केलो.
दिल्लींत भाजपाची आनी काँग्रेसीची उक्ती आघाडी आसली हें सिध्द करपा खातीर दोन पुरावे आसात. वेंचणुकेंत काँग्रेसीक शुन्य सुवातो मेळिल्ल्यो तरी लेगीत तांणी फोग लावन भाजपाच्या जैताची आनी आपाचे हारीची खोशी मनयल्ली. शुन्य येवन लेगीत तुमी खोशी कित्याक असो प्रस्न केले उपरांत देवेंद्र यादव हांणी म्हणिल्लें हे खेपेचें शुन्य फाटले खेपेच्या शुन्या परस खूब बरें आसा, असो दावो नायक हांणी केलो.
ते भायर काँग्रेस पक्षाक वेंचणुकेच्या फक्त 40 दिसाच्या काळांत 44 कोटी रुपयांची नगद देणगी आयल्ली. आपान दिल्लींत 10 वर्सां सरकार चलयतलें, पूण आमी फक्त पुराय वेंचणुकेंत 14.5 कोटी रुपया खर्च केल्ले. काँग्रेस पक्षान नगद 44 कोटी मोडले आनी हे पयशे तांकां भाजपा कडल्यान आयिल्ले, असो आरोप वाल्मिकी हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
