भांगरभूंय | प्रतिनिधी
20 वा 21 मार्चाक मुंबय यात्रा सोंपतली
नवी दिल्ली, खबरां संस्था: राहुल गांधी हांच्या फुडारपणा खाला काँग्रेसीच्या ‘भारत जोडो न्याय यात्रे’क आयज आयतारच्या अमिपुरच्यान सुरवात जाली. लोकसभा वेंचणुके पयलीं बेरोजगारी, म्हारगाय आनी समाजीक न्याय हे मुद्दे यात्रे वरवीं लोकां मुखार मांडटले. ही यात्रा पूर्व ते पश्चीम दिकेन 15 राज्यांतल्यान वतली आनी मुंबय सोंपतली.
हे यात्रेक इम्फाळच्या थौबल जिल्ह्यांतल्यान सुरवात जातली. काँग्रेस अध्यक्ष मल्लिकार्जून खरगे आनी पक्षाचे वरिश्ठ फुडारी ह्या वेळार हाजीर आसतले. ही यात्रा वट्ट 6,713 किलोमीटर अंतर पार करतली. पूण ‘भारत जोडो यात्रे’प्रमाण हें सगळें अंतर पांयानी चलचे नात, चडसो प्रवास बसीन करतले. कांय अंतर पांयांनी चलतले. सुमार 67 दिसांच्या काळांत 110 जिल्हे, 100 लोकसभा मतदारसंघ आनी 337 विधानसभा मतदारसंघांतल्यान ही यात्रा वतली. 20 वा 21 मार्चाक मुंबय यात्रा सोंपतली.
नागालँड, अरुणाचल प्रदेश, मेघालय, पश्चीम बंगाल, झारखंड, ओडिशा, छत्तीसगड, उत्तर प्रदेश, मध्य प्रदेश, राजस्थान, गुजरात आनी महाराष्ट्र असो यात्रेच्या प्रवासाचो मार्ग आसतलो. यात्रा उत्तर प्रदेशांत सगळ्यांत चड 11 दीस आसतली. अमेठी, रायबरेली सयत प्रधानमंत्री नरेंद्र मोदी हांच्या वाराणसी मतदारसंघांतल्यान यात्रा वतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
