भांगरभूंय | प्रतिनिधी
राजन घाटे : म्हापश्यां 23 वेर काँग्रेसी वतीन शहीद दिसाचें आयोजन
भांगरभूंय । प्रतिनिधी
म्हापशें : शहीद भगतसिंग हांणी बंदखणींतल्या कैद्यांक गरजेच्यो सुविधा मेळच्यो म्हूण 116 दिसांचें उपोशण केल्लें. तांची आनी महात्मा गांधीजींची विचारधारा एक आशिल्ली. काँग्रेस पक्षांत मतभेद आसूं येतात, पूण मनभेद मात नात, अशें सेवा दलाचे प्रदेश मुखेली राजन घाटे हांणी सांगलें.
म्हापशेंच्या पक्षाच्या जिल्हो कार्यालयांत आयोजीत पत्रकार परिशदेंत घाटे उलयताले. तांचे वांगडा गट अध्यक्ष नगरसेवक अॅड. शशांक नार्वेकार आनी डॉ. रिचर्ड फर्नांडीस हाजीर आशिल्ले.
काँग्रेस पक्षा वतीन शहीद दिसा आयतारा 23 मार्चाक सकाळीं 9.30 वरांचेर म्हापश्यां शहीद स्मारकाचे सुवातेर कार्यावळीचें आयोजन केलां. प्रदेश सेवा दल आनी काँग्रेस म्हापशें गट समिती हांच्या जोडपालवान ही कार्यावळ जातली. शहीद स्वातंत्र्यविरांक ह्या वेळार आर्गां ओंपतले. ह्या वेळार पक्ष प्रभारी डॉ. अंजली निंबाळकर, प्रदेशाध्यक्ष अमित पाटकर, आदले मंत्री एम. के. शेख, अमरनाथ पणजीकार आनी हेर पुडारी हाजीर रावतले. दरेका भारतीयांनी हे कार्यावळीक हाजीर रावचे, असो उलो घाटे हांणी मारलां. देशाक स्वातंत्र्य मेळचें हे खातीर शहीद भगतसिंग, सुखदेव आनी राजगुरू सारके हुतात्मा, स्वातंत्र्यसैनीक आनी महात्मा गांधी, जवाहरलाल नेहरू, सरदार वल्लभभाई पटेल, तशेंच काँग्रेसीच्या फुडाऱ्यांचें व्हड योगदान आसा. स्वातंत्र्याचे चळवळी खातीर 101 वर्सां आदीं काँग्रेस पक्षान सेवा दलाची स्थापना केल्ली. जाल्यार शहीद विरांक फांशीच्या खटल्यांत आरएसएसच्या कार्यकर्त्यांनी साक्षीदाराची भुमिका वठयल्ली. जांचें देशाच्या स्वातंत्र्या खातीर कुस्कुटाचेंय योगदान नाशिल्लें, ते आयज देशभावना सांगपाक लागल्यात, असोय आरोप घाटे हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
