भांगरभूंय | प्रतिनिधी
भांगरभूंय । खबरां मेज
पणजीः बजरंग दलाची प्यॉप्युलल फ्रँट ऑफ इंडियाकडेन (पीएफआय) तुळा करून बजरंग दलाचेर बंदी घालपाची मागणी कर्नाटक प्रदेश काँग्रेस समितीन आपल्या वेंचणूक जाहिरनाम्यांत केल्या. बजरंग दलाची बदमानी केल्ले खातीर दल आनी विश्व हिंदू परिशदेच्या चंदिगड प्रभागान काँग्रेसाचे राष्ट्रीय अध्यक्ष मल्लिकार्जुन खरगे हांका नोटीस धाडून 100 कोटी 10 लाख रुपयांच्या मानहानीचो दावो केला. विश्व हिंदू परिशदेचे राष्ट्रीय म्हणयारे विनोद बन्सल हांणी ही म्हायती दिली.
दहशतवाद्यांक वाटावपा खातीर हिंदूक कलंकीत करपाचो यत्न काँग्रेस करीत आसता. बजरंग दलाचें राष्ट्र काम सेगीत सुरू आसता. कोरोनाच्या काळांत तशेंच सैमीक आपत्चीच्या वेळार बजरंग दल सेवा काम करता. दलाचेर आरोप करून पीएफआय वाटावपाचो यत्न काँग्रेस करता जाल्यार ते केन्नाय येसस्वी जावचे नात अशें बन्सल हाणे सांगलां. बजरंग दलाचेर बंदी घालपाची मागणी कर्नाटक काँग्रेसान जरी केल्या तरी खंयच्याय राज्य सरकाराक विशीश्ट संघटनेचेर बंदी घालपाचो कायदेशीर अधिकार आसना. पीएफआयाचेर केंद्र सरकारान पयलींच बंदी घातल्या. कर्नाटक काँग्रेस आनी कसली तांचेर बंदी घालतले अशें कर्नाटक उच्च न्यायालायाची वकील शुभा नायकान म्हणलां.
बजरंग दल आनी पीएफआय हाचा तुळाच जावपाक शकना. दल राष्ट्रभक्त संघटना जाल्या पीएफ आय राष्ट्र विरोधी आनी दहशतवादी संघटना आसा. हिंदूक बदनाम करप हो काँग्रेसाचो इतिहास आसा अशें हिंदू जनजागृती समितीचो म्हणयारो नरेंद्र सुर्वेन सांगलें. हाचे पयलीं राष्ट्रीय स्वयंसेवक संघ, सनातन संस्था, हिंदू जनजागृती समिती ह्या हिंदू संघटनाचेंर काँग्रेसान बंदी घालपाचो यत्न केल्लो. मात जिहादी संघटनांचेर बंदी हाडची हे खातीर तांणी कांय केलें ना. हिंदू समाज आता जाग्रुत जाता अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
