भांगरभूंय | प्रतिनिधी
-प्रभारी माणिकराव ठाकरे सयत हेर फुडाऱ्यांनी घेतली भेट
पणजी: केंद्रान विधेयक मंजूर केले उपरांतूय आपल्या मागणे खातीर आझाद मैदानाचेर आंदोलन करपी एसटी समुदायांतल्या फुडाऱ्यांची शेनवारा काँग्रेस प्रभारी माणिकराव ठाकरे, प्रदेशाध्यक्ष अमीत पाटकार, विरोधी पक्षफुडारी युरी आलेमांव, आमदार एल्टन डिकॉस्ता, कार्लुस फेरेरा, विजय भिके आनी हेर फुडाऱ्यांनी भेट घेतली. हे आंदोलन काँग्रेस एसटी फुडाऱ्यां वांगडा आसतले, अशी हमीय तांणी आंदोलकांक दिली.
राज्यांतल्या एसटी आरक्षणाचो विशय लोकसभा वेंचणुके आदीं पेटपाची शक्यताय मतींत घेवन केंद्र सरकार फाटल्या मंत्रीमंडळ बसकेंत हे विशींचे विधेयक मंजूर केले. संसदेच्या फुडल्या अधिवेशनांत विधेयकाक मंजुरी दिवपाची हमीय केंद्रान दिल्या. पूण, विधेयका बदला केंद्रान अध्यादेश आनी अधिसुचोवणी जारी करची, अशी मागणी करीत एसटी समाजाच्या कांय फुडाऱ्यांनी आझाद मैदानाचेर आंदोलन सुरू केलां. शेनवारा गोंयांत दाखल जाल्ल्या माणिकवार ठाकरे हांणी हेर फुडाऱ्यां वांगडा आंदोलकांची भेट घेतली आनी तांचे वांगडा रावपाची हमीय दिली.
मजगतीं, आंदोलन आयतारा बसका घेवन आंदोलनाची फुडली दिशा थारायतले. लोकसभा वेंचणुकेच्या फाटभुंयेर सुरू जाल्ल्या ह्या आंदोलनाचो राजकी नदरेन फायनो करून घेवपाचे यत्न कॉग्रेस आनी रिव्हॉल्यूशनरी गोवन्साच सुरू केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
