भांगरभूंय | प्रतिनिधी
मनोज परबः कागाळे संबंदान म्हापशेंच्या उपनगर नियोजकाक विचारलो जाब
भांगरभूंय । प्रतिनिधी
म्हापशें: बार्देस म्हालांत बिगर गोंयकार बिल्डर लॉबीं कडल्यान आधुनीक खोपींच्या (मॉडर्न स्लम) नांवान इकॉसिस्टमीचेर घालो घालतात. बार्देसांतल्या 18 मेगा प्रकल्पांक रिव्होल्युशनरी गोवन्सान (आरजी) हरकत घेतल्या. पुराय गोंयातल्या काँक्रीटच्या रानांक नगरनियोजन खातें जापसालदार आसा, असो आरोप आरजीचे मुखेली मनोज परब हांणी केला.
सोमारा सकाळीं मनोज परब आनी आरजीच्या कार्यकर्त्यांनी म्हापश्याचे उपनगर नियोजक जयदेव हळदणकार हांची भेट घेतली. बार्देसांतल्या 18 बांदकाम प्रकल्पां विशीं कागाळ दिवन दोन म्हयने जाले, पूण कार्यालया कडल्यान हे संबंदांत कसलोच प्रतिसाद दिवंक नाशिल्ल्यान उपनगर नियोजकाक जाब विचारलो.
हे संबंदांत मनोज परब हांणी सांगलें, बार्देसांत मेगा प्रकल्पाच्या नांवान टीसीबी कडल्यान दिल्लींतल्या बिल्डर लॉबींक दोंगर, माळराना वयले जमनींचें रुपांतर करपाक परवानगी दितात. ह्या वेळार थंयची इकॉसिस्टम आनी मुळाव्या सुविधांचो विचार करिनात. न्यायालयाचो आदेश मोडून ह्या खात्या वतीन स मिटर प्रस्तावीत रस्त्याच्या आदारान मेगा प्रकल्पांक परवाने दिवपें सत्र चलयलां. नेरूल वाठारांत अशेच तरेन परवानगी दिल्ल्या एका मेगा प्रकल्पाचें काम आरजीन बंद उडयलें. मुळांत गोंयकार आपले दोंगर वा शेत जमनी विकतात तरीय थंय बागायतीच्या दिश्टीकोनांतल्यान उदरगत जातली, हें पळोवप नगरनियोजन खात्याची जापसालदारकी. पूण मंत्री, आमदार आनी टीसीपी अधिकारी ह्या जमनींचें रुपांतर करून बिल्डर लॉबींक थंय काँक्रीटच्या बांदकामांक परवानगी दितात. ह्या वेळार कोयर, उदक आनी इकॉसिस्टमीचो विचार जायना. ताका लागून गोंयच्या घट्टणाक नगरनियोजन खातेंच जापसालदार आसा, असो आरोप परब हांणी केलो.
हरकत घेतिल्ले मेगा प्रकल्प
बार्देसांत आसगांवां 11, शिवोले 2, थिये 3, रेवोड्यां 1 आनी कामुर्ले 1 अशे मेळून 18 प्रकल्पांक आरजीन हरकत घेतल्या. ह्या मेगा प्रकल्पांक लागून गांवांतली जैवविविधता, उदका पुरवण हाचेर परिणाम जातलो. दरेके सुवातेर 100 ते 150 फ्लॅट बांदतात. ह्या फ्लॅटांनी गोंयकार रावचे ना जाल्यार बिगर गोंयकार रावतले. आसगांवां जमनीचो दर 1.20 लाख रुपया चौखण मिटराक आसा. ताका लागून गोंयकार ह्यो जमनी घेवपाकूच शकनात, असो दावो मनोज परब हांणी केला.
उपनगर नियोजकान मारली कूस
म्हापशेंचे नगर तशेंच ग्राम नियोजन कार्यालयांतले उपनगर नियोजक जयदेव हळदणकार हांची आरजीचे कागाळीचेर प्रतिक्रिया घेवपाचो पत्रकारांनी यत्न केलो. त्या वेळार तांणी आपल्या कॅबिनांतल्यान कूस मारली. ते भायर आरजीच्या वांगड्यां वांगडा पत्रकारांक कॅबिनांत रावपात पत्रकारांक हळदणकार हांणी न्हयकार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
