भांगरभूंय | प्रतिनिधी
पणजी : बँक, कंपनी वा खंयचेय सेवे कडेन संबंदीत कस्टमर केअर नंबर गुगलाचेर सोदतना लोक फटींगपणाक बळी पडटात. कारण गुगलाचेर दिसपी सगलेच नंबर अधिकृत आसतातूच अशें ना. जायते फावट सायबर गुन्यांवकार फटीचे (फेक) नंबर घालून गिरायकांक फटयतात आनी तांच्या बँकेच्या खात्यांतले पयशे नाच्च करतात.
सायबर तज्ञांच्या मतान, फटींग कस्टमर केअर प्रतिनिधी कॉल करप्यांक फटींग वेबसायटी वा ऍप्सांचें लिंक धाडटात, जंय लॉगीन केलें काय तुमची म्हायती सरळ स्कॅमरां कडेन वता. कांय गुन्यांवकार स्वताक बँक अधिकारी म्हणून वळख करून दितात आनी OTP, खातें नंबर, पिन, आधार म्हायती मागतात. जाल्यार कांय जाण AnyDesk, TeamViewer सारकिल्ले रिमोट ऍक्सेस ऍप्स डावनलोड करपाक लावन मोबायल वा संगणक हॅक करतात. कॉलार बेगोबेग चेंपण हाडून लोकांक घाई करून संवेदनशील म्हायती दिवपाक लायतात.
गिरायकांक सुचवणी
केन्नाय OTP, डेबीट/क्रेडीट कार्डचो पिन, नेटबँकिंगचो पासवर्ड वा मोबायल स्क्रीनस शेअर करची न्हय. खंयच्याच अनवळखी ऍपाची लिंक डावनलोड करची न्हय. ट्रुकॉलराचेर नंबराक व्हेरिफायड बॅज जरी आसलो तरी तो १००% अधिकृत आसतलोच अशें ना. ताका लागून अधिकृत स्त्रोतां वेल्यानूच नंबर तपासप गरजेचें. जर खंयचोय गिरायक फेक कस्टमर केअर स्कॅमाचो बळी थारल्यार रोखडेंच लागींच्याच पुलीस स्टेशनांत वचून कागाळ दिवची. तशेंच राष्ट्रीय सायबर गुन्यांर रिपोर्टिंग पोर्टल (www.cybercrime.gov.in)चेर ऑनलायन कागाळ नोंद करूं येता. खात्यांतले पयशे कापीत जाल्यार बँके कडेन संपर्क करचो आनी संबंदीत कंपनीकूय ह्या फटींगपणां विशीं म्हायती दिवची
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
