भांगरभूंय | प्रतिनिधी
भांगरभूंय । खबरां मेज
पणजीः राज्य सरकाराची देवळांच्या जिर्णोद्धारा खातीर आशिल्ली येवजण इतिहासीक म्हत्व आशिल्ली थळां, तशेंच किल्लें, चर्ची आनी मशिदींच्या जिर्णोद्धारा खातीर कसलोच भेदभाव करनास्तना लागू करची अशी विनवणी विरोधी पक्ष फुडारी युरी आलेमांव हांणी मुख्यमंत्री डॉ प्रमोद सावंत हांका एक पत्र धाडून केल्या. सगळ्या धर्मीक आनी इतिहासीक थळांचें नूतनीकरण, सोबितीकरण करपा खातीर भेदभाव करनास्तना निधी दिवचो अशें तांणी ह्या पत्रांत मागलां.
सरकारान फकत देवळांच्या जिर्णोद्धारा कडेन लक्ष दिलां. गोंयांत हेर जायती इतिहासीक म्हत्वाची थळां तशेंच हेर धर्माची थळां सरकाराच्या प्राधान्यक्रमांत नात. पुरातत्त्व खात्याचे मंत्री सुभाष फळदेसाय हांणी सुरू केल्ली ही येवजण फकत देवळां खातीर आसा. चर्ची वा मशिदींत ती लागू जावची ना अशें सांगून सरकारान लोकां मदीं दुजाभाव तयार केला असो आरोप युरी आलेमांव हांणी आपल्या पत्रांत केला.
देवळांच्या इतिहासीक म्हत्वाच्या आदारान जिर्णोद्धार करपा खातीरल लोकांचो पयसो खर्च कररपाचो सरकाराचो हेत आसल्यार सरकारान दोट्टी मापदंड दवोरून इतिहासीक म्हत्व आशिल्ल्या हेर धर्मियांच्या थळां कडेन भेदभाव करून तांका निधी न्हयकारपाक शकना, अशें तांणी पत्रांत स्पश्ट केलां.
नार्वें हांगा आशिल्ल्या श्री सप्तकोटेश्वर देवळाचो जिर्णोद्धार आनी सोबितीकरण सरकारान केला हाची म्हाका खोस आसा. कुंकळ्ळी हांगचे चीफटेन्स यादस्तीक, मंडगांवचे लोहिया मैदान, पणजेचें आझाद मैदान, असोळणें आनी पत्रादेवी हांगचे हुतात्मो यादस्तीक तशेंच गोंय क्रांती चळवळ आनी गोंय मुक्ती चळवळी केडन संबंदीत हेर इतिहासीक म्हत्वाची थळां सद्या जिर्णोद्धार आनी सोबितीकरणाची वाट पळयतात. बेतलांतलो किल्लो, शापोरा किल्लो, कोलवाळ किल्लो आनी हेर किल्ल्याची राखण आनी जतनयाक करपाची गरज आसा. ही सगळीं थळां इतिहासीक म्हत्वाची थळां म्हणून अधिसूचीत करपाची मागणी युरी आलेमांव हांणी केल्या.
विधानसभेच्या दुसऱ्या अधिवेशनांत सगळी इतिहासीक थळां अधिसूचीत करपाचें आस्वासन मुखमंत्र्यांन म्हाका दिल्लें. सरकारा वतीन ह्या थळाची राखण, जतन आनी देखभाल करपा खातीर फावो तीं पावलां घालतले अशें तांणी सांगिल्लें. मात दुर्दैवान आतां मेरेन सरकारान कसलीच कार्यवाही सुरू केल्ली ना हे आलेमांव हांणी आपल्या पत्रां वरवीं मुख्यमंत्र्याचे नदरेक हाडून दिलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
